ABŞ-da tanınmış mühafizəkar şərhçi Tucker Carlson ABŞ prezidenti Donald Trump-ı İranla bağlı siyasətinə görə kəskin tənqid edib. Bu barədə CNN məlumat yayıb.
Bildirilir ki, təxminən 21 ay əvvəl Karlson Respublikaçılar Partiyasının 2024-cü il milli qurultayında Trampın sui-qəsddən sağ çıxmasını “ilahi müdaxilə” kimi qiymətləndirmişdi. Lakin hazırda jurnalist prezidentə münasibətdə tam fərqli mövqe sərgiləyir və son çıxışında onun siyasətini ciddi şəkildə pisləyib.
Karlson çıxışı zamanı Trampın İranın mülki infrastrukturuna qarşı təhdidlərini “hərbi cinayət” və “mənəvi cinayət” adlandıraraq bunun kütləvi əzab və ölümlərə səbəb ola biləcəyini vurğulayıb. O, həmçinin Trampın sosial şəbəkədə Pasxa səhəri paylaşdığı və İrana yönəlmiş təhdidlər səsləndirdiyi postu “bütün səviyyələrdə iyrənc” kimi qiymətləndirib.
Şərhçi qeyd edib ki, prezidentin bəzi mövqeləri doğru olsa da, belə addımları dəstəkləmək mümkün deyil: “Bu, şərdir”.
Karlson əlavə olaraq, Tramp administrasiyasının İranda bir ibtidai məktəbi qəsdən bombalamış ola biləcəyini iddia edib. O, həmçinin prezidentin gələcəkdə İrana qarşı nüvə silahından istifadə edə biləcəyi ehtimalını dilə gətirərək, ABŞ rəsmilərini buna qarşı çıxmağa çağırıb.
Jurnalist ABŞ prezidentini dini dəyərlərə hörmətsizlikdə də ittiham edib. Onun sözlərinə görə, Trampın İslamla bağlı istehzalı açıqlamaları digər dinlərə qarşı hörmətsizliklə eynidir. Karlson həmçinin Trampın andiçmə mərasimində İncilə əl qoymamasını qəsdən atılmış addım kimi qiymətləndirib.
Çıxışının sonunda Karlson ABŞ rəsmilərinə müraciət edərək, prezidentə “qəti yox” deməyə çağırıb.
Bu çıxış Karlson ilə Tramp arasında indiyədək ən ciddi fikir ayrılıqlarından biri kimi qiymətləndirilir.
- Gecə Modu
- Ana səhifə
- Statistika
- Mənbələr
- Reytinq
- Hava
- Valyuta
