ABŞ-dən gələn dəstək Macarıstanda seçki yarışına təsir edə bilərmi?
Musavat.com xəbər verir ki, “Politico” saytının analitik yazısında (müəlliflər: Ceymi Dettmer və Eli Stokols) belə bir sual qoyulub.
Yazıda ABŞ vitse-prezidenti Cey Di Vensin Macarıstana səfərinin baş nazir Viktor Orban üçün kritik seçki ərəfəsində son şans kimi qiymətləndirildiyi qeyd olunur.
Məqalədə bildirilir ki, Orban uzun illər hakimiyyətdə qalmasına baxmayaraq, bu dəfə ciddi siyasi mübarizə ilə üz-üzədir və onun mövqeləri zəifləyib. Sorğular göstərir ki, müxalifətdə olan Peter Macarın rəhbərlik etdiyi “Tisza” partiyası artıq irəlidədir.
Qeyd olunur ki, ABŞ prezidenti Donald Tramp artıq bir neçə dəfə Orbanı açıq şəkildə dəstəkləyib. Lakin bu dəstək onun reytinqini ciddi şəkildə artırmayıb.
Vensin Budapeştə səfəri Orban üçün siyasi fürsət olsa da, bunun seçkinin nəticəsinə həlledici təsir edəcəyi ehtimalı aşağı qiymətləndirilir.
Məqalədə vurğulanır ki, Orban özünü Tramp administrasiyasının Avropadakı əsas müttəfiqi kimi təqdim etməyə çalışır. O, illər əvvəl milli populizm, Avropa İttifaqına tənqidi yanaşma və media üzərində nəzarət kimi siyasətlərlə MAGA xəttinə uyğun kurs formalaşdırmışdı.
Ağ Ev isə bu səfəri daha çox siyasi jest kimi qiymətləndirir. Bildirilir ki, Orban Trampı çətin dövrlərdə – xüsusilə hakimiyyətdən kənarda olduğu illərdə də dəstəkləyib və hazırkı addım bu münasibətə qarşılıq kimi təqdim olunur.
Buna baxmayaraq, sorğular Orban üçün mənfi mənzərə göstərir. Macarıstanda iqtisadi problemlər, korrupsiya iddiaları və hakim partiyaya qarşı narazılıq artır. “Politico”nun “Poll of Polls” göstəricilərinə görə, müxalifət artıq üstünlük qazanıb.
Eyni zamanda qeyd olunur ki, ABŞ dövlət katibi Marko Rubionun əvvəlki səfəri də vəziyyəti dəyişməyib. Analitiklər hesab edir ki, Trampın özü şəxsən seçkiyə müdaxilə etməsə, bu cür dəstək real nəticə verməyəcək.
Ekspertlərdən Timoti Eş bildirib ki, Vens kimi fiqurların təsiri məhduddur və seçicilərin davranışını ciddi şəkildə dəyişmir.
“Politico” yazır ki, hətta Macarıstanda Trampa münasibət Qərbi Avropaya nisbətən daha müsbət olsa da, onun dəstəyi seçkidə qələbəyə zəmanət vermir. Sorğulara görə, əhalinin 48%-i Trampın təsirini mənfi, 38%-i isə müsbət qiymətləndirir.
Nəticə etibarilə, “Politico”nun təhlilinə görə, ABŞ-dən gələn dəstək Orbana müəyyən siyasi impuls versə də, bu, seçkinin nəticəsini dəyişmək üçün yetərli olmaya bilər.
Musavat.com
