“Deputat Səyyad Aranın Milli Məclisdə ciddi problemlərlə, nazirlərə iradları ilə bağlı çox çıxışları olub. Bu məni razı salıb ki, Yeni Azərbaycan Partiyasının nümayəndəsi olmasına baxmayaraq tənqidi çıxışlar edir. Amma sonuncu müsahibəsində dediklərini Səyyad müəllimə yaraşdırmadım. Necə oldu ki, ağzından belə söz çıxdı... Əvvəla, hamı ali təhsil ala bilmir. Təkcə ona görə yox ki savadları yoxdur. Çoxu ödənişli təhsili ödəyə bilmir. 300-400 manat maaşın alınması özü elə bizə nöqsandır. Elə etməliyik ki, insanlar çox maaş alsınlar. Dünən oğlumun 27 yaşı oldu. Hələ də işsizdir. Kürəkənim də işsizdir. Nə deyim, vallah. İstəyirəm ki, onlar da işləsinlər. Tək mənim övladım yox, bütün millətin balaları işlə təmin edilsinlər. İnana bilmirəm ki, Səyyad müəllim belə deyib”.
Bu sözləri Pravda.az-a açıqlamasında sabiq deputat Tahir Kərimli deyib.
O xatırladıb ki, vaxtilə Milli Məclisdə rəsmi şəkildə deputat maaşlarının artırılmasının əleyhinə olub: “Dedim ki, bizim yox, camaatın maaşı artmalıdır. Populistlik etmək istəmirəm. Deyərlər ki, indi nə arzusu var... Heç vaxt razı olmaram ki, kiminsə maaşı aşağı salınsın, o cümlədən deputatların. Hətta deputat yoldaşlarım o vaxt mənə irad tutdular ki, deputat maaşı istəmirsənsə, get evində otur. Camaatımızın, xalqımızın aldığı maaş, pensiya, müavinət artırılmalıdır. Hazırda bütün sahələr üzrə maaş artımı ilə bağlı islahatlar gedir. Görək necə olacaq... Çox ciddi iş yerləri olmalıdır. Fürsətdir, İran müharibəsi ilə bağlı neftin qiyməti qalxıb. Heç olmasa, əldə olunan artımı investisiya şəklində Azərbaycanda iş yerlərinin açılmasına yönəltmək lazımdır. Həmişə şükür edirəm ki, pensiya alıram. Hamı bilir ki, nə maaşımı, nə də pensiyamı tək yemirəm. Üç-dörd günün içində bitir. Ehtiyacı olanlarım çoxdur”.
Qeyd: Parlamentin üzvü Səyyad Aran bir müddət öncə, müsahibələrinin birində maaşlarla bağlı səsləndirdiyi fikir tənqidlə qarşılanıb. Deputatın “Mən günahkaram ki, kimsə 300-500 manat maaş alır? İnsan zəhmət çəkib oxuyar, ali təhsil alar, işlədiyi yerdə fərqlənər, yeni ideyalarla çıxış edər. Cəmiyyətdə orta yaşayan da var, kasıb da var, bir az yaxşı yaşayan da var. Kimisi istedadı ilə irəli çıxır, mükafat alır. Hamı bunu edə bilmirsə, onda susub oturmalıdır” mövqeyi birmənalı qarşılanmayıb.
Aytəkin Qardaşova
