Paris, 6 aprel, AZƏRTAC
Fransanın paytaxtı Parisdə Milli Qvardiyada irqi ayrı-seçkiliyə məruz qaldığını iddia edən 29 yaşlı jandarm tərəfindən verilən şikayət əsasında istintaq aparılır.
AZƏRTAC xəbər verir ki, Milli Qvardiya məlumatı təsdiq edib.
Hərbi qulluqçu irqi xarakterli mənəvi təzyiq və qərəzli təhqir iddiaları ilə məhkəməyə müraciət edib və o, dindirilib.
Şikayətin əsas səbəbi jandarmın xidmət yerindəki mənzilin poçt qutusuna yerləşdirilmiş anonim irqi xarakterli məktubdur. Şikayətçi bildirir ki, məktub onun işdən sonra keçirilən tədbirdə ənənəvi geyimdən istifadə etməsi ilə bağlıdır. O, həmçinin deyir ki, xidmətə başladığı ilk gündən irqi ayrı-seçkiliyə, o cümlədən şəxsi həyatında ərəb dilindən istifadə etdiyinə görə haqsızlıqlara məruz qalıb.
Milli Qvardiyanın məlumatına görə, diskriminasiyanın qarşısını almaq üçün daxili mexanizmlər yaradılıb. Belə davranışa qarşı “sıfır tolerantlıq” siyasəti tətbiq edilir və şikayətlər sistematik olaraq araşdırılır.
