Çin şirkəti BYD beynəlxalq bazarda hədəfini daha da yüksəltmək qərarına gəlib.
Marja xəbər verir ki, Şirkət 2026-cı il üçün ixrac hədəfini 1,5 milyon avtomobilə çatdırıb. Bu hədəf, şirkətin daxili bazarda yarana biləcək zəifliklərə qarşı riskləri balanslaşdırmaq strategiyasının bir hissəsi kimi qiymətləndirilir.
BYD rəhbərliyi analitiklər üçün toplantıda 2026-cı ildə 1,5 milyon avtomobil ixrac edəcəklərinə əmin olduqlarını bildirib. Bu yeni hədəf, ilin əvvəlində açıqlanan 1,3 milyon avtomobil hədəfindən təxminən 15% yüksəkdir. Keçən illə müqayisədə isə bu, 24% illik artımdır.
BYD keçən il 150% böyümə göstərib
Şirkət 2025-ci ildə cəmi 1 milyon 46 min 83 yeni enerji ilə işləyən avtomobil (PHEV (Plug-in Hybrid Electric Vehicle) – Elektriklə işləyən hibrid avtomobil+ tam elektrik) ixrac edərək illik 150% artım əldə edib. Bu avtomobillər həm sərnişin, həm də yük daşıyan nəqliyyat vasitələrini əhatə edir. 2025-ci ilin ümumi satışları isə 4,6 milyon ədəd təşkil edib. Bu rəqəmlər içərisində Batareyalı tam elektrik sərnişin avtomobili (BEV) satışları rekord səviyyəyə çataraq 2 milyon 256 min 714 ədəd olub. Bu güclü göstəricilər BYD-nin BEV seqmentində Tesla-nı ilk dəfə üstələməsinə imkan verib.
