ABŞ xam nefti bir barel üçün 114 dolları keçib. Bunun səbəbi, ABŞ Prezidenti Donald Trampın İrana Hürmüz Boğazını çərşənbə axşamına qədər açması üçün vaxt verməsi və əks halda enerji stansiyalarına hücum etməklə hədələməsi olub.
May ayı üzrə ABŞ xam neftinin fyuçers qiymətləri əvvəlki qazancının bir hissəsini geri verərək 0,5% artımla bir barel üçün 112,08 dollara yüksəlib. Beynəlxalq etalon olan Brent neftinin qiyməti də 1,3% artaraq 110,47 dollar səviyyəsində ticarət olunub.
Tramp bazar günü sosial mediada nalayiq ifadələr olan paylaşım edərək İranın boğazı açmaması halında “cəhənnəmdə yaşayacağını” bildirib.
Tramp ölkənin enerji stansiyalarını və körpülərini bombalamaqla hədələyib.
Tramp daha sonra “Çərşənbə axşamı, saat 20:00 (Şərq vaxtı)!” şəklində əlavə açıqlama vermədən yeni paylaşım edib.
İran neft tankerlərinə qarşı hücumlar vasitəsilə Hörmüz Boğazını faktiki olaraq bağlı saxlayır. Bu dəniz yolu Fars körfəzini dünya bazarlarına bağlayır. Müharibədən əvvəl qlobal neft təchizatının təxminən 20%-i bu boğazdan keçirdi.
Boğazın bağlanması tarixdə ən böyük neft təchizatı kəsintisinə səbəb olub. Müharibənin başlanmasından bəri xam neft, aviasiya yanacağı, dizel və benzin qiymətləri sürətlə yüksəlib.
Tramp keçən çərşənbə etdiyi xalqa müraciətində müharibənin daha iki-üç həftə davam edəcəyini bildirib.
TD Securities-ə görə, ayın sonuna qədər təxminən 1 milyard barel təchizat itkisi yaşanacaq. Bunun 600 milyon bareli xam neft, təxminən 350 milyon bareli isə emal olunmuş məhsullardan ibarət olacaq.
