Tehran ABŞ və İsrail təyyarələrini izləmək və müəyyən etmək üçün çoxspektrli kameralardan ibarət mürəkkəb şəbəkədən istifadə edir.
Musavat.com xəbər verir ki, bu barədə İsrail Müdafiə Nazirliyinin keçmiş yüksək rütbəli rəsmisi məlumat verib.
İsrail hökumətinə təhlükəsizlik məsələləri üzrə məsləhət verən İsrail Müdafiə və Təhlükəsizlik Forumunun sədri Amir Avivi bildirib ki, İran düşmən təyyarələrinin populyar və ya strateji marşrutları boyunca görünən işıq diapazonundan kənarda məlumat toplayan kameralar yerləşdirib.
Onun sözlərinə görə, İran qüvvələri bu kameralar vasitəsilə hədəfləri aşkar etdikdən sonra onları vurmağa çalışır.
Avivinin qeyd etdiyinə görə, 12 günlük müharibədən sonra İran rəsmiləri İsrailin onların radiolokasiya sistemlərini asanlıqla aşkar edib sıradan çıxara bildiyini, bununla da Tehranın hava məkanına nəzarət imkanlarını itirdiyini anlayıblar.
Ekspert əlavə edib ki, radiolokasiya qurğularından fərqli olaraq, bu kameralar siqnal ötürmür. Bu isə İsrailin həmin sistemləri müəyyən etməsini və yerini tapmasını qeyri-mümkün edir.
Musavat.com
