Alimlər Marianas adaları yaxınlığında sualtı vulkanın kraterində yaşı 2050 ildən çox ola bilən nəhəng daşvari mərcan aşkarlayıblar.
HİT.az xəbər verir ki, məlumatı "EcoNews" yayıb.
ABŞ Milli Okean və Atmosfer İdarəsinin (NOAA) tədqiqatçı qrupunun bildirdiyinə görə, bu “meqamərcan” Mauq adlı sualtı vulkanın kalderası daxilində yerləşir. Bu ərazi yüksək karbon qazı emissiyaları səbəbindən “şampan dolu stəkanda üzmək” kimi təsvir olunur.
Buna baxmayaraq, turş mühitə baxmayaraq Porites cinsinə aid mərcan koloniyası inkişaf etməyə davam edir və təxminən üç basketbol meydançası ölçüsündə bir sahəni əhatə edir.
Alim Tomas Oliver bildirib ki, obyektin ölçüsünə görə onu təhlükəsizlik səbəbilə tam dəqiqliklə ölçmək mümkün olmayıb: “Bu mərcan o qədər böyük idi ki, dalış zamanı mövcud təhlükəsizlik məhdudiyyətlərinə görə onu asanlıqla ölçə bilmədik".
Koloniyanın əsası təxminən 200 fut (61 metr) diametrə malikdir, hündürlüyü isə 100 futdan (30 metrdən) çoxdur. Bu göstəricilər onu ABŞ Samoasında tapılan əvvəlki rekordçudan 3,4 dəfə daha böyük edir.
Mütəxəssislər onun dəqiq yaşını müəyyənləşdirməyin çətin olduğunu bildirirlər. NOAA proqramının baş alimi Hanna Barkli qeyd edib ki, bu mərcan digər növlər kimi böyümə halqaları formalaşdırmır.
Tədqiqatçılar hesab edirlər ki, təxminən iki min illik bu canlı mərcan okean dəyişikliklərinin “canlı şahidi” ola bilər və gələcəkdə riflərin sağ qalması barədə mühüm ipucları verə bilər.
Hazırda bu nəhəng mərcan “Marian çökəkliyi Milli Dəniz Abidəsi” çərçivəsində qoruma altına alınıb.
Samir
