ain.az, Oxu.az saytından verilən məlumata əsaslanaraq xəbər yayır.
ABŞ Prezidenti Donald Tramp İranın enerji sisteminə zərbələrə tətbiq olunan moratoriumu (təxirəxalma) aprelin 6-dək uzadıb. Siyasətçi qeyd edib ki, fasilə İran hökumətinin xahişi ilə uzadılıb. O, təmasların dayandırılması barədə yayılan məlumatları təkzib edib və əlavə edib ki, Tehranla danışıqlar çox yaxşı gedir.
Xatırladaq ki, martın 23-də Tramp "uğurlu danışıqlardan" sonra İrana qarşı hava zərbələrinin beş gün müddətinə dayandırılacağını açıqlamışdı. Martın 25-də isə Vaşinqton Tehrana 15 maddəlik sülh planı təqdim edib, martın 26-da "Tasnim" agentliyi İranın cavab göndərdiyini bildirib.
Trampın sözügedən moratoriumu uzatması Vaşinqton-Tehran qarşıdurmasının yeni mərhələyə keçdiyini göstərir. Bu qərarın İran hökumətinin xahişi ilə verildiyi iddiası isə diplomatik və informasiya müstəvisində diqqətçəkən məqamdır. ABŞ tərəfi bu müddət ərzində həm hərbi, həm də siyasi rıçaqlarını qoruyur, eyni zamanda İran üzərində təzyiqi davam etdirir. Belə moratoriumlar adətən ya arxa planda danışıqların getdiyini, ya da tərəflərin mümkün eskalasiyaya hazırlaşmaq üçün vaxt qazandığını göstərir.
Rəsmi Tehranın hələlik açıqlama verməməsi də təsadüfi deyil. İran daha əvvəl Trampın bu tip bəyanatlarını təkzib etmişdi və ABŞ-nin ritorikasını təzyiq və zaman əldə etmək cəhdi kimi qiymətləndirmişdi. Lakin İranın bu dəfə sükutu onu deməyə əsas verir ki, ya həqiqətən də tərəflər arasında müəyyən mesajlaşma baş verib, ya da Tehran bu bəyanatı legitimləşdirməmək üçün gözləmə mövqeyi tutur.
İranın enerji sistemi ölkənin həm iqtisadi, həm də əsas strateji dayaqlarından biridir. Bu sahəyə zərbə endirilməsi daxili sabitliyi poza, ixrac imkanlarını zəiflədər, regional təsir gücünü azalda bilər. Məhz buna görə enerji obyektləri potensial hədəf kimi seçilir. Bu qərarla ABŞ bir neçə istiqamətdə ismarış verir: hərbi variant yenə də masadadır, Vaşinqtonun prosesi nəzarətdə saxladığı bildirilir, "dialoq pəncərəsi" isə açıq saxlanılır.
Beləliklə, qarşıdakı günlərdə Trampın bəyanatı və ona münasibətdə İranın rəsmi reaksiyası mənzərəni daha aydın göstərəcək. Hələlik isə münaqişə nə həll olunur, nə də daha da aktiv fazaya keçir.
Ən son xəbərləri və yenilikləri almaq üçün ain.az saytını izləyin.
