ABŞ-nin Yaxın Şərqdəki hərbi gərginlik və Ukraynadakı müharibə fonunda hava hücumundan müdafiə imkanlarını gücləndirmək üçün bütün NATO müttəfiqlərinə müraciət etdiyi məlum olub. “Politico” nəşrinin yaydığı məlumata görə, Vaşinqton Alyansa daxil olan ölkələrdən, o cümlədən Polşadan “Patriot” zenit-raket komplekslərini (ZRK) müvafiq bölgələrə ötürməyi xahiş edib.
NOCOMMENT.az xəbər verir ki, NATO ölkələrindən birinin anonim rəsmisi nəşrə açıqlamasında Polşaya qarşı heç bir xüsusi təzyiqin olmadığını vurğulayıb: “Bu məsələ bütün müttəfiqlərə ünvanlanıb. Vaşinqton konkret bir ölkəni hədəf almayıb, ümumi müraciət edib”.
Məlumata görə, ABŞ-nin sorğusu iki istiqaməti əhatə edir:
Ukrayna: Rusiya ilə müharibədə hava məkanının qorunması üçün əlavə “Patriot” batareyalarının təmin edilməsi.
Yaxın Şərq: Bölgədəki NATO obyektlərini və hərbi bazalarını potensial raket hücumlarından qorumaq üçün müdafiə sistemlərinin yerləşdirilməsi.
Qeyd olunur ki, Polşanın öz təhlükəsizlik qayğıları səbəbindən bu sistemləri verməyə tərəddüd etməsi barədə xəbərlər yayılsa da, rəsmi Vaşinqton bu ehtiyacın kollektiv şəkildə qarşılanmasını istəyir. Hazırda NATO daxilində batareyaların bölüşdürülməsi və strateji nöqtələrə daşınması ilə bağlı müzakirələr davam edir. Ekspertlər hesab edirlər ki, “Patriot” sistemlərinə olan bu qlobal tələbat Qərbin hərbi sənaye potensialının və mövcud ehtiyatlarının ciddi sınağına çevrilib.
Sara
NOCOMMENT.az
