O bildirib ki, bu film onların dostluq körpüsü olub: "Mən düşünürdüm ki, görəsən, bu iki nəhəng aktyor mənim oyunumu bəyənəcəklərmi. Ancaq Rasim Ocaqov elə bir şırait yaratdı ki, hər kəs yüksək səviyyədə öz rolunu oynadı. Biz film çəkilişləri zamanı Rasim Balayevlə dostlaşdıq, yaxın adamlar olduq. Mən onun Azərbaycanda sevildiyini bilirdim, ancaq Türkiyədə də sevildiyinin şahidi oldum. O, gözəl və təkrar olunmayan aktyor idi.
Bizim çəkilişlər saat 11-də başlayırdı və saat 2-də bitirdi. Günün ikinci yarısını boş olurduq. Biz də Rasimlə bundan istifadə edib, gedib İstanbulu gəzirdik. Ən çox da Bəyoğlundakı Örtülübazara getməyi xoşlayırdıq. Orada yeməkxanada yemək yeyirdik, söhbət edirdik və sonra da gecə hotellərimizə qayıdırdıq. Biz onunla orada doğmalaşdıq, elə dost olduq ki".
Aktyor bildirib ki, bu dostluq sonralar da davam edib: "Rasimlə həmişə telefonla danışırdıq. Tədbirlərdə qoluma girirdi, gedirdik. Onun ayağında problem var idi, çətin yeriyirdi, mən də kömək edirdim. Heyif o günlərimizdən. Mən qardaşımı, dostumu itirdim, heyif ondan. Onun şəxsiyyəti, insanlığı həmişə qəlbimdə yaşayacaq".
