Ermənistanda 7 iyunda keçiriləcək parlament seçkiləri yaxınlaşdıqca, ölkədəki siyasi gərginlik sadəcə hakimiyyət davası olmaqdan çıxıb, bölgənin taleyini həll edəcək bir “müharibə anonsu”na çevrilib. Baş nazir Nikol Paşinyanın rəhbərlik etdiyi “Mülki Müqavilə” Partiyası seçki kampaniyasını tamamilə “ya mən, ya da qaçılmaz müharibə” ritorikası üzərində qurub. Paşinyan vətəndaşlarla görüşlərdə Ermənistanın 29,8 min kvadrat kilometrlik beynəlxalq səviyyədə tanınmış ərazi maketini hədiyyə edərək, guya sülh tərəfdarı olduğunu nümayiş etdirir. Lakin bu görüntünün arxasında xalqı qorxu ilə idarə etmək cəhdi dayanır. O, açıq şəkildə bəyan edir ki, əgər iyun ayında keçiriləcək seçkilərdə onun komandası parlamentdə mütləq üstünlük qazanmasa, bu, sentyabr ayında Azərbaycanla yeni və genişmiqyaslı bir müharibənin başlanğıcı olacaq. Paşinyan bu taktika ilə həm daxili auditoriyanı çıxılmaz vəziyyətdə qoyur, həm də beynəlxalq birliyə “məndən başqası gəlsə, bölgə yanacaq” mesajını verir.
Məsələ ilə bağlı NOCOMMENT.az-a danışan siyasi şərhçi Azər Hüseynov bildirib ki, Ermənistandakı hazırkı seçki mühiti barıt çəlləyini xatırladır: “Nikol Paşinyanın sentyabrda müharibə xəbərdarlığı sadəcə seçki manipulyasiyası deyil, həm də Ermənistan cəmiyyətinin qarşısında qoyulmuş ağır bir ultimatumdur. O, xalqa deyir ki, səs verərkən proqramlara deyil, övladlarınızın ölüb-ölməyəcəyinə qərar verin. Paşinyan komandası Qarabağ mövzusunu qapatmaqla Azərbaycanın ərazi bütövlüyünü tanıdıqlarını iddia etsələr də, rəqib düşərgənin – keçmiş prezidentlər Robert Köçəryan və Serj Sərkisyanın addımları bu gərginliyi daha da körükləyir. Biz görürük ki, müxalifət sülh gündəmini dəyişməyəcəklərini desə də, əməldə tamamilə fərqli, revanşist bir mənzərə sərgiləyir”.
O, qeyd edib ki, Robert Köçəryanın son müsahibəsindəki xəritə qalmaqalı Paşinyanın müharibə iddialarını vizual olaraq təsdiqləyən ən böyük faktordur: “Köçəryanın öz iqamətgahında verdiyi müsahibədə arxa fondakı monitorda Azərbaycanın işğaldan azad edilmiş 7 rayonunun və keçmiş Dağlıq Qarabağın hələ də Ermənistan ərazisi kimi təqdim olunduğu xəritəni qəsdən nümayiş etdirməsi təsadüfi deyil. Bu, həm Azərbaycanın suverenliyinə qarşı açıq hörmətsizlik, həm də erməni seçicisinə verilən işğal vədi mesajıdır. Köçəryan bu xəritəni jurnalistlərlə öz arasına yerləşdirməklə göstərir ki, onun hakimiyyətə gəlişi ‘status-kvo’nun bərpası və yeni qanlı toqquşmaların başlanğıcı deməkdir. Beləliklə, Ermənistanda seçki yarışı “sülh maketi” paylayan Paşinyanla “işğal xəritəsi” asan Köçəryan arasında gedən və hər iki halda sentyabr ayında bölgəni yeni bir hərbi risklə üz-üzə qoyan amansız bir mübarizədir. Bu gərginlik göstərir ki, Ermənistan hələ də real sülhə deyil, öz daxili siyasi ambisiyaları üçün hərbi eskalasiyanı masada saxlayan təhlükəli bir oyunun iştirakçısıdır”.
