Yəmən Silahlı Qüvvələri 28 mart tarixində yaydığı bəyanatda İsrailə qarşı ilk hərbi əməliyyatını həyata keçirdiyini bildirib. Açıqlamada qeyd olunub ki, ölkə qüvvələri işğal olunmuş Fələstinin cənubunda yerləşən “həssas hərbi hədəflərə” ballistik raketlər atıb.
Bəyanata görə, bu addım Yəmənin daha əvvəl İran İslam Respublikasına və Livan, İraq və Fələstin istiqamətlərində fəaliyyət göstərən müqavimət qüvvələrinə dəstək məqsədilə birbaşa hərbi müdaxilə edəcəyini elan etməsi ilə əlaqədardır.
Yəmən tərəfi bildirib ki, bölgədə artan hərbi eskalasiya, infrastrukturun hədəfə alınması və Livan, İran, İraq və Fələstində baş verən hadisələr fonunda bu əməliyyat həyata keçirilib.
Yəmən Silahlı Qüvvələrinin sözçüsü general Yəhya Səri qeyd edib ki, əməliyyat İran və Livandakı “Hizbullah” qüvvələrinin fəaliyyəti ilə eyni vaxta təsadüf edib və hədəflər uğurla vurulub.
Bəyanatda həmçinin vurğulanıb ki, Yəmənin hərbi əməliyyatları qarşıya qoyulan məqsədlər əldə olunana və “müqavimət cəbhələrinə qarşı hücumlar dayandırılana qədər” davam edəcək.
Məlumatda o da qeyd olunub ki, ABŞ və İsrail 28 fevral tarixində İranın ali dini lideri Ayətullah Seyid Əli Xameneinin, eləcə də bir sıra yüksək rütbəli hərbçilərin və mülki şəxslərin öldürülməsindən sonra İrana qarşı genişmiqyaslı hərbi kampaniyaya başlayıb.
Son hücumların İranın həm hərbi, həm də mülki obyektlərini hədəf aldığı, ciddi insan itkiləri və infrastruktur dağıntılarına səbəb olduğu bildirilir. Buna cavab olaraq İran Silahlı Qüvvələrinin bölgədəki ABŞ və İsrail mövqelərinə raket və pilotsuz uçuş aparatları ilə cavab zərbələri endirdiyi vurğulanır.
