BAKI, 28 mart. TELEQRAF
"Kommunikasiya İdarəsini bu sammiti dünyanın ən çətin suallarının səmimi şəkildə müzakirə oluna bildiyi bir platformaya çevirdiyinə görə təqdir edirəm".
Teleqraf xəbər verir ki, bunu Türkiyənin xarici işlər naziri Hakan Fidan İstanbulda keçirilən Strateji Kommunikasiya Sammitindəki çıxışı zamanı deyib.
"Biz sadəcə qeyri-sabitlik dövründə yaşamırıq. Biz sistemli bir qırılma dövründə yaşayırıq. Bu, daha dərin struktur pozuntusunun nəticəsidir. Pozuntu o zaman baş verir ki, beynəlxalq sistem, mənəvi kompasını itirir, strateji uyğunluğunu itirir və legitimlik yarada bilmək qabiliyyətini itirir. Böhranlar isə o zaman yaranır ki, sülh və təhlükəsizliyi qorumaq üçün yaradılmış institutlar artıq, münaqişələri cilovlaya bilmir, eskalasiyanın qarşısını ala bilmir və ya sülhə aparan yollar yarada bilmir",-deyə H.Fidan əlavə edib.
Xarici işlər naziri vurğulayıb ki, bu gün qlobal idarəetmənin mövcud vəziyyəti funksional deyil, iflic vəziyyətindədir və davamlı deyil:
"Prezident Rəcəb Tayyib Ərdoğanın qlobal ədalət və beynəlxalq institutların islahı ilə bağlı çağırışı siyasi şüar deyil, diaqnoz idi. Bir çoxlarının yalnız böhran öz qapılarına gəldikdə qəbul etdiyi bir diaqnoz. Birləşmiş Millətlər Təşkilatının tribunasından tutmuş çoxsaylı çoxtərəfli platformalara qədər biz davamlı olaraq xəbərdarlıq etdik. O zaman isə bir çoxları geosiyasi komfort zonalarının illüziyasına üstünlük verdi. İllər boyu qeyri-funksional sistemin bədəlini başqaları ödədiyi müddətdə, bir çoxları öz maraqlarına xidmət edən status-kvonu qorumaqla kifayətləndi. Lakin bu gün həmin illüziya dağılıb".
