Rusiyada falçı, astroloq və ekstrasenslərə marağın azalması artıq statistik tendensiyaya çevrilib. Yerli mənbələrin məlumatına görə, xüsusilə 30 yaşdan aşağı gənclər gündəlik suallar, gələcək planlar və hətta şəxsi qərarlarla bağlı cavabları artıq ənənəvi “mistik xidmətlərdən” yox, ChatGPT kimi süni intellekt platformalarından alırlar.
Ölkə.Az xəbər verir ki, "Mash" Telegram kanalının yazdığına görə, əvvəllər falçılara ən çox verilən suallar — gələn ilin proqnozları, münasibətlər, imtahan nəticələri və “uğur gətirəcək qərarlar” idi. İndi isə eyni suallar daha sürətli, pulsuz və daha “məntiqli” cavablar vəd edən neyron şəbəkələrə yönəlir.
Maraqlıdır ki, bu dəyişiklik əsasən gənc nəsildə müşahidə olunur. 40 yaşdan yuxarı insanlar arasında isə astroloji proqnozlara, tarot falına və ekstrasens xidmətlərinə maraq hələ də qalmaqdadır. Bu da bazarın tam yox olmadığını, sadəcə transformasiya olunduğunu göstərir.
Ekspertlər qeyd edir ki, bu tendensiya yalnız Rusiyaya xas deyil. Avropa ölkələrində də gənclər “rəqəmsal məsləhətçilərə” üstünlük verməyə başlayıblar. Məsələn, ABŞ-də “AI life advice” (süni intellektdən həyat məsləhətləri almaq) artıq ayrıca trendə çevrilib. Türkiyə və postsovet ölkələrində isə falçılar hələ də aktiv olsa da, onlayn platformalara keçid edirlər.
Bununla yanaşı, qeyd etmək lazımdır ki, bazar ölmür, sadəcə daha analitik və məntiqli formatla əvəzlənir.
Dəyişikliyin isə bir neçə əsas səbəbi var. Birincisi, sürətli olması. Belə ki, cavab saniyələr içində gəlir. O cümlədən pulsuz və ya ucuz olması da böyük rol oynayır. Anonimlik isə insanları şəxsi sualları verməkdən çəkindirmir. Habelə daha rasional yanaşma ortaya çıxır: mistik yox, məntiqi izahlar üstünlük qazanır.
İnsanlar artıq “taleyi oxutmaqdan” çox, öz qərarlarını analiz etdirmək istəyir. Süni intellekt isə bu boşluğu sürətlə doldurur. Görünən odur ki, yaxın illərdə falçılıq bazarı ya daha da kiçiləcək, ya da tamamilə rəqəmsallaşaraq yeni formaya düşəcək.
Miri
Ölkə.Az
