Avropa ölkələri ABŞ-ın resurslarını İranla bağlı münaqişəyə yönəltməsinə baxmayaraq, Ukraynaya hərbi dəstəyi davam etdirir. Bu barədə Fransanın xarici işlər naziri Jean-Noël Barrot bildirib. Onun sözlərini “European Pravda” nəşri yayıb.
Nazir ABŞ-ın İrandakı müharibə ilə bağlı resurslarının “müəyyən səviyyədə səfərbər edildiyi” ilə razılaşıb. Onun sözlərinə görə, yalnız ABŞ deyil, Fransa da daxil olmaqla digər ölkələrin hərbi və digər resursları da Yaxın Şərqdə öz maraqlarını qorumaq üçün səfərbər olunur.
“Avropa ölkələri səfərbər olunub. Artıq dörd ildən çoxdur ki, bizə dəfələrlə deyilir ki, guya fəlakət yaxınlaşır və bu və ya digər tərəfdən tədarüklər tezliklə dayanacaq. Amma bu baş vermədi,” – deyə Barro qeyd edib.
Bundan əvvəl Böyük Britaniyanın baş naziri Keir Starmer Rusiyanın Ukrayna münaqişəsində qalib gəldiyi ilə bağlı iddiaları rədd edərək, Kiyevə əlavə dəstək göstərilməsinə çağırıb. Onun sözlərinə görə, Rusiyanın “kölgə donanması”na qarşı əlavə tədbirlər də görülməlidir. Starmer bildirib ki, Avropa Rusiyanın prezidenti Vladimir Putin üzərində təzyiqi artıraraq “narrativi dəyişdirməlidir”.
O iddia edir ki, “yerindəki vəziyyət belədir ki, Ukrayna möhkəm dayanır” və hətta “əraziləri geri qaytarır”. Onun fikrincə, “həqiqət budur ki, Rusiya qalib gəlmir”.
