Türkiyənin füsunkar və dünya miqyasında tanınan Kapadokya bölgəsində təşkil olunan ənənəvi Salomon Cappadocia Ultra Trail yarışı son 12 ildə ölkənin ən diqqətçəkən idman tədbirlərindən biri kimi seçilir. Hər il 2 mindən çox iştirakçını bir araya gətirən bu mötəbər yarış Kapadokyanın unikal və valehedici təbiətində keçirilərək həm idman, həm də turizm baxımından böyük maraq doğurur.
Beynəlxalq arenada da yüksək qiymətləndirilən tədbir bu dəfə nüfuzlu mükafata layiq görülüb. Birləşmiş Millətlər Təşkilatının turizm qurumu və Beynəlxalq Avtomobil Federasiyası (FIA) tərəfindən təşkil edilən “Dayanıqlı İdman Turizmi üzrə Mükəmməllik Mükafatları” çərçivəsində yarış “İdman Turizmində İcma Təsiri” kateqoriyası üzrə qalib elan olunub.
Beynəlxalq səviyyədə ilk dəfə keçirilən və FIA-nın dəstəyi ilə təşkil olunan “Dayanıqlı İdman Turizmi üzrə Mükəmməllik Mükafatları” idman turizmi sahəsində dayanıqlılığı, innovativ yanaşmaları və icma iştirakını bir araya gətirən təşəbbüsləri ön plana çıxarır. Münsiflər heyətinin qiymətləndirməsinə əsasən, Salomon Cappadocia Ultra Trail öz kateqoriyasında ən yüksək bal toplayaraq xüsusi fərqlənib.
Yarış dayanıqlılığa sadiqliyi, yerli inkişaf prosesinə real töhfələri, ətraf mühitə həssas yanaşması və idman turizmi vasitəsilə destinasiya brendinin gücləndirilməsində oynadığı rol ilə seçilib. Bu göstəricilər tədbirin yalnız idman yarışı olmadığını, eyni zamanda strateji turizm aləti kimi əhəmiyyətini ortaya qoyur.
Türkiyə Turizm Tanıtım və İnkişaf Agentliyinin (TGA) dəstəyi və Argeus Travel & Events tərəfindən təşkil olunan bu nüfuzlu yarış ölkənin trail-running təqvimində xüsusi yer tutur. Yeni təsis olunmuş BMT-nin Turizm Təşkilatı mükafatında əldə edilən bu uğur isə Türkiyənin dayanıqlı idman turizmi sahəsində aparıcı istiqamətlərdən biri kimi mövqeyini daha da möhkəmləndirir.
“Dayanıqlı İdman Turizmi üzrə Mükəmməllik Mükafatları”nın təqdimat mərasimi qlobal idman turizmi sahəsinin ən nüfuzlu platformalarından biri çərçivəsində baş tutaraq əlamətdar hadisəyə çevrilib. Mərasim martın 19-da İspaniyanın paytaxtı Madrid şəhərində, ABB Formula E FIA World Championship 2026 CUPRA Raval Madrid E-Prix yarışının geniş proqramı daxilində təşkil olunub.
Tədbir çərçivəsində idman və turizmin vəhdəti ilə dayanıqlı turizmin inkişafına töhfə verən qabaqcıl layihələr və uğurlu təcrübələr mükafatlandırılıb. Bununla yanaşı, mərasim sahə üzrə dövlət qurumları və sənaye liderləri üçün təcrübə mübadiləsi aparmaq, yeni əməkdaşlıqlar qurmaq baxımından da mühüm platforma rolunu oynayıb.
Salomon Cappadocia Ultra Trail hər il dünyanın müxtəlif ölkələrindən olan idmançıları Kapadokyanın bənzərsiz təbiətində bir araya gətirməyə davam edir. UNESCO-nun Dünya İrsi siyahısına daxil edilmiş Göreme Açıq Hava Muzeyi və qeyri-adi qaya formaları ilə tanınan bu bölgə 2026-cı ildə yarışa artıq 13-cü dəfə ev sahibliyi edəcək.
İdmanın birləşdirici gücündən faydalanan tədbir təkcə iştirakçıları deyil, həm də trail running həvəskarlarını və çoxsaylı tamaşaçıları regiona cəlb edir. Yarışın yaratdığı dinamika Kapadokyada turizm axınının artmasına və bölgənin beynəlxalq səviyyədə daha geniş tanınmasına mühüm töhfə verir.
Hər il keçirilən yarışlar vasitəsilə həm Türkiyəyə, həm də Kapadokyaya marağı artıran bu təşkilat dayanıqlı idman turizmi sahəsində beynəlxalq liderlərdən biri kimi seçilir. BMT-nin Turizm Təşkilatı tərəfindən verilən mükafat isə bu mövqeyi daha da gücləndirir.
BMT-nin Turizm Təşkilatı və FIA-nın qlobal kommunikasiya şəbəkələri vasitəsilə yarışın beynəlxalq görünürlüğünün artacağı gözlənilir. Bu isə həm tədbirin təsir dairəsinin genişlənməsinə, həm də Türkiyənin turizm potensialının daha geniş auditoriyaya çatdırılmasına əlavə imkanlar yaradacaq.
Təbii müxtəlifliyi ilə seçilən Türkiyə firuzəyi dəniz sahillərindən qızılı qumlu çimərliklərə, sıx meşələrdən əzəmətli dağların qoynunda uzanan vadilərə qədər zəngin landşaft təqdim edir. Bu rəngarəng coğrafiya açıq hava həvəskarları üçün geniş imkanlar yaradır. Qədim sivilizasiyaların izlərini daşıyan mənzərələrdə yürüşlər, fərqli relyeflərdə velosiped turları, qarlı zirvələrdə xizək, şam meşələri arasında qolf, dərin kanyonlarda rafting və kanyoning, paraqlaydinq və qayaya dırmanma kimi adrenalin dolu fəaliyyətlər, eləcə də saf sularda sörf və dalğıclıq — bütün bunlar Türkiyəni bu sahədə unikal istiqamətlərdən birinə çevirir.
