ABŞ və İsrail mərkəzli media qurumları Vaşinqton rəhbərliyinin İranla müharibəni sona çatdırmağı hədəfləyən 15 maddəlik bir plan təqdim etdiyini iddia edib. Naməlum rəsmilərə əsaslanan xəbərlərdə təklifin məzmunu və vasitəçilik prosesinə dair kritik detallara yer verilib.
SİA xarici KİV-ə istinadən xəbər verir ki,
Wall Street Journal qəzetinin xəbərinə görə, plan İranın üç əsas nüvə obyektini tamamilə sökməsini və ölkə ərazisində bütün zənginləşdirmə fəaliyyətlərinə son qoymasını şərt qoyur.
Layihə mətnində həmçinin Tehrandan ballistik raket proqramını dayandırması, bölgədəki proksi qüvvələrə göstərdiyi dəstəyi kəsməsi və Hörmüz Boğazını beynəlxalq hərəkətə tam açması tələb olunur.
Xəbərdə bu addımların atılması qarşılığında İrana qarşı nüvə yönümlü sanksiyaların ləğv ediləcəyi və ABŞ-ın ölkədəki mülki nüvə proqramına dəstək verəcəyi irəli sürülüb.
New York Times qəzeti hazırlanan planın Tehrana Pakistan vasitəsilə çatdırıldığını yazıb. Xəbərdə Pakistan Ordusunun Komandanı Mareşal Seyyid Asim Munirin iki ölkə arasında diplomatik əlaqələrdə əsas vasitəçi kimi rol oynadığı qeyd edilib.
İsrail mərkəzli Kanal 12 isə ABŞ-ın sözügedən 15 maddəni müzakirə etmək üçün tərəflər arasında bir aylıq atəşkəs elan edilməsini istədiyini bildirib.
Hadisələrlə bağlı ABŞ və İran rəsmilərindən hələlik rəsmi açıqlama verilməyib.
