Novruz və Ramazan bayramları ilə əlaqədar qeyri-iş günləri düzgün qidalanma mövzusunu aktuallaşdırıb. Bir tərəfdən zəngin Novruz süfrələri, digər tərəfdən bir aylıq orucluq qaydaları ilə qidalanma gündəlik qida rejiminin düzgün tərtib olunmasını zəruri edir.
Pravda.az-a açıqlama verən nutrisioloq Zeynəb Azərinin sözlərinə görə, iki bayramın eyni günə düşməsi ən son 162 il öncə olub.
O bildirib ki, əvvəllər bu qədər qeyri-sağlam qidalar yox idi və süni şəkər bu qədər istifadə edilmirdi: “Ona görə də o zamanlar Novruz qidalanması başqa cür idi, fəsadları olmurdu. Ramazan ayından sonra insanlarda istər-istəməz şişkinlik olur. Bir çox insanların şikayəti xüsusilə də qarın nahiyəsində yaranan piylənmədir. Bu onunla əlaqədardır ki, gün ərzində yeməyib, birdən-birə iştah açılıb yedikdə həzm pozğunluqları əmələ gəlir. Ramazandan sonra şişkinlik varsa, tövsiyə edirəm ki, razyana bitkisindən istifadə etsinlər, köp əleyhinədir. Razyana, nanə çayı dəmləyib içmək məsləhətdir. Novruz bayramında bütün evlərdə bayram şirniyyatları bişir, elimizin çox gözəl adətidir. Ancaq onlar həddindən artıq kalori deməkdir və orqanizm üçün zərərlidir. Novruz şirniyyatlarından yeyilirsə, gündəlik bir çay qaşığı miqdarında darçın istifadə edilməlidir. Bu, həm şirniyyata meylliliyi, həm də həmin şirniyyatların orqanizmə ziyanını azaldır. Şirniyyatlar ağ un, süni şəkərdən hazırlandığı üçün orqanizmə birbaşa zərərdir”
Mütəxəssis vurğulayıb ki, bayram günlərində çox insan kökəlməkdən narahat olur, ancaq heç bir qida təkbaşına kökəlmə vermir: “Gün ərzində sağlam qidalanılırsa, rasiona şirniyyat da əlavə etmək olar və ölçülü istifadə edildikdə kökəlmə problemi ilə qarşılaşmaz. Amma təəssüf ki, əksər insanlarda bayram zamanı düzgün qidalanma forması alınmır. Əksər adamlar bayram günlərində səhər qidalanmasına şirniyyatla başlayırlar. Bu da böyük yanlışdır. Günə hansı qida ilə başlamaq gün ərzində iştahanın necə idarə olunmasına təsir göstərir. Buna görə də səhərə ilk qida kimi şəkərbura və paxlava ilə başlamaq tövsiyə edilmir. Çünki onlar sadə karbohidratdır, insana daha tez toxluq hissi versə də, daha sonra insana aclıq gəlir və gün ərzində yüksək iştah davam edir. Tövsiyə edirəm ki, yumurta və ondan hazırlanan qidalardan istifadə etsinlər. Omlet, “pomidor yumurta” və digər yeməklər ola bilər. Səhər qidalanmasında iki yumurta yemək məsləhətdir. Daha sonra bir ədəd şəkərbura və ya paxlava ilə çay içilə bilər. Ancaq aclığı həmin qidalarla doldurmağa ehtiyac yoxdur. Xüsusilə də xanımlar bayramdan sonra kökəlmələrindən şikayətçidirlər. Hətta bir neçə gün ərzində artıq çəki alanlar var. Qeyd etdiyim sadə karbohidratlı şirniyyaların bir qramı bədəndə dörd qram su saxlayır. Bu gün yeyib səhərisi gün tərəziyə çıxılan zaman görünən artım ödəmlə bağlıdır. Bədənə su toplanmasıdır. Dərhal piyə çevrilmir. Əsas tövsiyəm budur ki, bayramlarda yanlış qidalanma uzun müddət davam etdirilməsin, düzgün qidalanaraq sadə karbohidratlar rasiondan çıxarılsın”.
Şəhanə Quliyeva
