Avropa Birliyi (AB) Komissiyasının sədri Ursula von der Leyen təbii qaz və neft qiymətlərinin artmasının təsirlərini hiss etdiklərini bildirib.
O, Yaxın Şərqdəki münaqişələrə son qoymaq üçün İranla danışıqlar masasına oturmağın vaxtı olduğunu söyləyib.
"Cebheinfo.az" xəbər verir ki, Von der Leyen Avstraliya Baş naziri Entoni Albanese ilə Kanberrada keçirilən birgə mətbuat konfransında jurnalistlərin Yaxın Şərqdəki proseslərlə bağlı suallarını cavablandırıb.
"Düşünürik ki, danışıqlar masasına qayıtmağın və münaqişələrə son qoymağın vaxtıdır", - deyə von der Leyen Yaxın Şərqdəki vəziyyətin qlobal enerji təchizatı baxımından kritik hala gəldiyini vurğulayıb:
"Hamımız təbii qaz və neft qiymətlərinin təsirlərini hiss edirik. Bu, biznesimizə və cəmiyyətlərimizə təsir edir. Lakin ən vacib məsələ danışıqlar yolu ilə həll yoluna çatmaq və Yaxın Şərqdə gördüyümüz münaqişələrə son qoymaqdır".
AB ölkələrinin Hörmüz boğazında hansı rol oynaya biləcəyi ilə bağlı suala cavab olaraq Von der Leyen bildirib:
"AB liderləri münaqişələr başa çatdıqdan sonra bir əməliyyat və ya missiyanı qabaqcadan görə biləcəklərini açıq şəkildə bildiriblər.
Lakin Hörmüz boğazında lazımi gücün təmin edilməsi ilə bağlı onların qərarlarını qiymətləndirmək mənim səlahiyyətimdə deyil".
