ABŞ prezidenti Donald Tramp İranla müharibədə ən çətin qərarlarından biri ilə üz-üzədir.
Musavat.com xəbər verir ki, bu barədə CNN saytında xüsusi yazı dərc olunub.
Məqalədə bildirilir ki, prezident Donald Tramp Ağ Evdə keçirilən gündəlik müşavirələrdə hərbçilərlə birlikdə İrana quru qoşunlarının göndərilməsi variantını müzakirə edir.
Bununla belə, Tramp ictimaiyyət qarşısında ehtiyatlı danışır:
“Əsgərləri heç yerə göndərmirəm. Göndərsəm belə, bunu sizə deməzdim”, – deyə o bildirib.
Ağ Evin mətbuat katibi Karolayn Livitt də deyib ki, prezident hələ qərar verməyib və bütün variantlar masadadır.
Müharibənin gedişində əsas fiqurlardan biri Pentaqonun rəhbərliyi və Birləşmiş Qərargah Rəisləri Komitəsinin sədri general Den Keyndir. Onun təqdim etdiyi planlara əsasən, ABŞ-nin məqsədi İranın hərbi potensialını – donanmasını, raket imkanlarını və sənaye bazasını zəiflətməkdir.
ABŞ kəşfiyyat sisteminin rəhbərləri də prosesə cəlb olunub. Milli kəşfiyyat direktoru Tulsi Qabbard Konqresdə bildirib ki, ABŞ və İsrailin müharibə məqsədləri tam üst-üstə düşmür. Onun sözlərinə görə, İsrail daha çox İran rəhbərliyini zəiflətməyə fokuslanıb.
CIA direktoru Con Retkliff isə qeyd edib ki, ABŞ zərbələrinə baxmayaraq, İranın zənginləşdirilmiş uran ehtiyatları hələ də qalır.
Eyni zamanda Beynəlxalq Atom Enerjisi Agentliyinin rəhbəri Rafael Qrossi xəbərdarlıq edib ki, yeraltı obyektlərdə saxlanılan materiallara zərbə endirilməsi ciddi risklər yarada bilər.
Vaşinqton daxilində siyasi təzyiq də artır. Respublikaçı senator Lindsi Qrem Trampın bu mövzuda çox əsəbi olduğunu bildirib. Digər respublikaçılar – Ceff Van Dryu, Tim Burçett və Mayk Flud – açıq şəkildə quru qoşunlarının göndərilməsinə qarşı çıxırlar. Onların fikrincə, ABŞ yeni uzunmüddətli müharibəyə sürüklənə bilər.
Digər tərəfdən, Trampın İsraillə münasibətləri də diqqət mərkəzindədir. Lakin İsrail tərəfi daha uzunmüddətli strategiyaya üstünlük verir.
Məqalədə qeyd olunur ki, ABŞ administrasiyası İranın əsas iqtisadi mərkəzlərindən biri olan Xarq adasını hədəf kimi nəzərdən keçirir. Bu addım İran iqtisadiyyatına ciddi zərbə vura bilər, lakin genişmiqyaslı əməliyyat tələb edir.
Ekspertlərin fikrincə, ən böyük problem İranın elmi və texnoloji potensialıdır.
“Bu bilikləri bombalamaq mümkün deyil”, – deyə avropalı diplomat bildirib.
CNN yazır ki, hazırda Trampın qarşısında iki əsas yol var: ya qələbə elan edib müharibəni dayandırmaq, ya da eskalasiyanı davam etdirərək ABŞ-ni daha dərin münaqişəyə cəlb etmək. Bu isə onun prezidentliyi üçün həlledici qərar hesab olunur.
Musavat.com
