İran ətrafında müharibə qlobal iqtisadiyyata ciddi təsir göstərir.
Musavat.com xəbər verir ki, müharibənin əsas təsiri enerji bazarları və tədarük zəncirləri vasitəsilə hiss olunur.
Xüsusilə neft və qaz idxalından asılı ölkələr ən böyük risk altındadır.
"Reuters" analitiklərinin hesablamalarına əsasən, böyük iqtisadiyyatlar arasında Almaniya və İtaliya enerji idxalından yüksək asılılıq səbəbindən istehsalın zəifləməsi təhlükəsi ilə üz-üzədir. Böyük Britaniya isə inflyasiya və elektrik enerjisi qiymətlərinin artımı ilə qarşılaşır.
Yaponiya üçün vəziyyət daha həssasdır, çünki ölkə neftin demək olar ki, hamısını və qazın böyük hissəsini Hörmüz boğazı vasitəsilə idxal edir. Bu isə həm inflyasiya, həm də valyuta risklərini artırır.
İnkişaf etməkdə olan ölkələr də ciddi zərbə alır. Hindistan neftin təxminən 90 faizini idxal edir və qiymət artımı artıq rupi kursuna və iqtisadi artım proqnozlarına təsir göstərir. Türkiyə inflyasiya və valyuta təzyiqi ilə üzləşir, lirəni sabit saxlamaq üçün ehtiyatlardan istifadə edir.
Ən ağır vəziyyət isə iqtisadi cəhətdən zəif ölkələrdə müşahidə olunur. Şri-Lanka, Pakistan və Misir kimi dövlətlərdə yanacaq və ərzaq qiymətlərinin artması, iş saatlarının azalması, valyutaların ucuzlaşması və turizm gəlirlərinin düşməsi qeydə alınır.
Ekspertlərin fikrincə, müharibə davam edərsə, dünya iqtisadiyyatı yeni enerji böhranı, neft və qaz qiymətlərinin daha da artması və inflyasiyanın dərinləşməsi ilə üzləşə bilər.
Musavat.com
