ain.az xəbər verir, Bizimyol saytına əsaslanaraq.
ABŞ-ın İrana qarşı hərbi əməliyyat çərçivəsində quru qoşunlarının tətbiqinə sürətlə keçə biləcəyi ehtimal olunur.
Bizimyol.info xəbər verir ki, bu fikri martın 20-də ABŞ Milli Kəşfiyyat Direktoru aparatında terrorla mübarizə mərkəzinin rəhbəri vəzifəsindən İslam Respublikasına qarşı əməliyyatla razılaşmadığı üçün ayrılan Co Kent səsləndirib.
“Gizli məlumatlara malik deyiləm, hərbi planlardan xəbərim yoxdur. Hətta bilsəydim belə, onları açıqlaya bilməzdim. Amma ABŞ prezidenti Donald Tramp bildirib ki, bütün variantlar nəzərdən keçirilir”, – deyə Kent “Breaking Points” podkastının aparıcısı Saagar Enjeti ilə müsahibəsində bildirib.
O əlavə edib ki, döyüş təcrübəsinə əsasən vəziyyət çox sürətlə dəyişə bilər: “Bəzən elə qərarlar olur ki, onların qəbulu üçün vaxtın olduğunu düşünürsən. Amma əslində bu vaxt olmaya bilər. Əgər hərbi imkanlar artıq yerləşdirilibsə, çox vaxt onlar istifadə olunur”, - deyə bildirib.
ABŞ-ın İrana qarşı əməliyyatının quru mərhələsinə keçid ehtimalını şərh edən Kent: “Bu məni narahat edir, hadisələr çox sürətlə inkişaf edə bilər”, - deyib.
Eyni gün "CBS News" telekanalı mənbələrə istinadən xəbər verib ki, Pentaqon prezidentin tapşırığı ilə İranda qoşunların yerləşdirilməsinə hazırlaşır, lakin belə əməliyyatın keçirilməsi ilə bağlı yekun qərar hələ qəbul edilməyib.
Bundan əvvəl "Fox News" ABŞ Müdafiə Nazirliyinin nümayəndəsinə istinadən bildirmişdi ki, "USS Boxer" universal desant gəmisinin rəhbərlik etdiyi amfibiya-desant qrupu və ABŞ dəniz piyadalarının 11-ci ekspedisiya dəstəsi Yaxın Şərqə doğru yola düşüb.
Təxminən 4,5 min dənizçi və dəniz piyadasından ibarət qrup martın 18-də Kaliforniya ştatının San-Dieqo şəhərindən yola çıxaraq hazırda Sakit okeanı keçir. Rəsmi şəxslərin qiymətləndirməsinə görə, onların Yaxın Şərqdə məsuliyyət zonasına çatması təxminən bir ay çəkəcək.
Əməliyyat birləşməsinə "USS Portland" desant-helikopter gəmi-doku və "USS Comstock" desant nəqliyyat-doku da daxildir.
Qadir, Bizimyol.info
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
