Birləşmiş Ərəb Əmirliklərinin (BƏƏ) Baş nazirinin müavini və xarici işlər naziri Şeyx Abdullah bin Zayed əl-Nəhyan ölkənin suverenliyini və ərazi bütövlüyünü qorumaq üçün beynəlxalq hüquq çərçivəsində bütün zəruri tədbirləri görmək hüququnu özündə saxladığını açıqlayıb.
Hafta.az yazır ki, BƏƏ 18 gündür davam edən və mülki yaşayış məntəqələrini, strateji obyektləri birbaşa hədəf alan raket hücumlarına cavab olaraq ən yüksək hərbi və diplomatik həyəcan siqnalı verib. Əl-Nəhyan beynəlxalq ictimaiyyətə müraciət edərək BƏƏ-nin özünümüdafiə hüququnun müzakirə mövzusu olmadığını vurğulayıb.
Nazir əl-Nəhyanın açıqlamasında son 18 gündə ölkəyə qarşı 2 mindən çox ballistik raket, qanadlı raket və pilotsuz uçuş aparatı (PUA) atıldığı bildirilib. Nazir bu hücumların regional sabitliyi açıq şəkildə təhdid etdiyini bildirib və həyatını itirən xarici işçilərin ailələrinə başsağlığı verib.
Hücumlar nəticəsində Fələstin, Pakistan, Banqladeş və Nepal vətəndaşı olan mülki işçilərin həyatını itirdiyi təsdiqlənib. BƏƏ hakimiyyəti bütün yaralıların dövlət tərəfindən təmin edilmiş müalicə aldığını və ölkə daxilində təhlükəsizlik vəziyyətinin nəzarət altında olduğunu bildirib.
Şeyx Abdullah bin Zayed BMT Təhlükəsizlik Şurasının 2817 saylı qətnaməsinə diqqət çəkərək, 136 üzv dövlətin dəstəyi ilə qəbul edilən bu qətnamənin İranın Körfəz dövlətlərinə və İordaniyaya qarşı hücumlarını dərhal dayandırmasını tələb etdiyini xatırladıb. BƏƏ hökuməti təcavüzkarın bütün itkilərə və maddi ziyana görə məsuliyyət daşıyacağını bir daha təkrarlayıb.
Nazir ölkə daxilində təhlükəsizlik hazırlıqlarının ən yüksək peşəkar standartlarda olduğunu və BƏƏ-nin terror fəaliyyətləri qarşısında geri çəkilməyəcəyini bildirib. 130-dan çox ölkənin BƏƏ ilə göstərdiyi həmrəylik Əbu-Dabi hökumətinin onilliklər ərzində apardığı məsuliyyətli diplomatiyanın nəticəsi kimi qəbul edilib.
