Kubada təxminən 10 milyon insan elektrik enerjisiz qalıb...
Poliqon xəbər verir ki, bu barədə CNN məlumat yayıb.
Hadisə 16 mart tarixində ölkənin milli enerji sistemində baş verən nasazlıq nəticəsində qeydə alınıb. Bildirilir ki, ABŞ tərəfindən tətbiq olunan neft blokadası onsuz da köhnəlmiş enerji sistemini iflic vəziyyətinə salıb.
Ölkənin dövlət enerji operatoru hazırda elektrik təchizatının bərpası istiqamətində işlərin davam etdiyini açıqlayıb. Qeyd olunub ki, nasazlıq zamanı işləyən enerji qurğularında texniki problem aşkarlanmayıb.
Son illərdə Kubada elektrik kəsintiləri tez-tez baş verir. Rəsmi şəxslər bunu ABŞ-ın tətbiq etdiyi iqtisadi sanksiyalarla izah edir. Tənqidçilər isə əsas səbəblərdən birinin enerji sektoruna investisiyaların azlığı olduğunu bildirir.
Kubanın elektrik enerjisi istehsalı əsasən neftdən asılıdır. Rəsmilərin sözlərinə görə, yanacaq tədarükünün faktiki blokadası ölkədə enerji böhranını daha da dərinləşdirib.
Hazırda qeyri-rəsmi bazarda benzinin qiyməti litr üçün 9 dollara qədər yüksəlib. Bu isə bir avtomobilin çənini doldurmağın 300 dollardan çoxa başa gəlməsi deməkdir ki, bu məbləğ bir çox kubalıların illik gəlirindən çoxdur.
Kubanın xarici işlər nazirinin müavini Karlos Fernandes de Kossio bildirib ki, ABŞ hakimiyyəti bu vəziyyətdən məmnun görünür və bunun hər bir kubalı ailəyə zərər vurduğunu qeyd edib.
Ölkə prezidenti Migel Diaz-Kanel isə son üç ay ərzində ölkəyə neft idxal olunmadığını açıqlayıb. Onun sözlərinə görə, ABŞ ilə bəzi ikitərəfli məsələlərin həlli üçün danışıqlar aparılıb.
Enerji böhranı səbəbindən hökumət fövqəladə tədbirlər görüb. Bunlara dərs saatlarının azaldılması, kütləvi tədbirlərin təxirə salınması və nəqliyyatın məhdudlaşdırılması daxildir.
Eyni zamanda, bir çox dövlət xəstəxanaları xidmətlərini azaltmalı olub, bəzi ərazilərdə isə yanacaq və texnika çatışmazlığı səbəbindən zibil yığılmağa başlayıb.
Yanacaq satışı ciddi şəkildə məhdudlaşdırılıb – yalnız turistlər, diplomatlar və xüsusi icazəsi olan şəxslər uzun növbələrdən sonra benzin ala bilir.
Enerji böhranı internet trafikində də ciddi azalmaya səbəb olub. Bundan əlavə, American Airlines, Delta Air Lines və JetBlue kimi aviaşirkətlər yanacaq çatışmazlığı səbəbindən Kubaya uçuşları dayandırıb.
ABŞ prezidenti Donald Trump isə ölkənin "dərin böhran" yaşadığını bildirib və Vaşinqtonun Kubaya münasibətdə müxtəlif ssenariləri nəzərdən keçirə biləcəyini qeyd edib.
Poliqon.info
