İranın polis rəisi ölkədə düşmənlərə məlumat sızdırdığı müəyyən edilən 500 nəfərin saxlanılaraq həbs edildiyini açıqlayıb.
Xalqcebhesi.az-ın xəbərinə görə, polis rəisi Əhmədrza Radan həbslərin nə vaxt baş verdiyinə dair təfərrüatlara girmədən bildirib ki, bu halların yarısı "hədəflərin vurulması üçün məlumat təmin edən və hücum yerlərinin görüntülərini çəkib göndərən şəxslər də daxil olmaqla" ciddi hadisələrlə bağlıdır.
Daha əvvəl İran mediası bazar günü müxtəlif bölgələrdə onlarla insanın həbs edildiyi barədə məlumat yaymışdı.
Yarı-rəsmi "Tasnim" xəbər agentliyi İranın şimal-qərbində hərbi və təhlükəsizlik obyektlərinin yerləşmə yerləri barədə məlumatları İsrailə göndərməkdə ittiham olunan 20 nəfərin əyalət prokurorluğu tərəfindən həbs edildiyini bildirib.
Hava hücumlarından nisbətən az təsirlənən İranın şimal-şərqində isə 10 nəfərin həbs edildiyi xəbər verilir. Onlardan bəziləri həssas mövqelər və iqtisadi infrastruktur haqqında məlumat toplamaq ittihamı ilə üzləşib.
"Tasnim"in məlumatına görə, İnqilab Keşikçiləri Korpusunun (SEPAH) kəşfiyyat təşkilatının regional bölməsi bildirib: "Sionist düşmən (İsrail) və ABŞ İranı işğal etməyə çalışarkən, növbəti addım kimi iğtişaşlar törətmək üçün muzdluları və casusları hərəkətə keçirirlər".
Məryəm Quliyeva
