"Arsenal"ın futbolçusu Maks Douman İngiltərə Premyer Liqası tarixinin rekorduna imza atıb.
QOL.az BBC-yə istinadən xəbər verir ki, o, bunu ötən gecə "Everton"la matçda (2:0) fərqlənməklə bacarıb.
16 yaş 73 günlüyündə olan yarımmüdafiəçi turnir tarixində qol vuran ən gənc futbolçu adını qazanıb. O, "Everton"un sabiq oyunçusu Ceyms Vonun 21 illik rekordunu qırıb. Von 2005-ci ildə 16 yaş 270 günlüyündə olarkən qol vurmuşdu.
Qeyd edək ki, Maks Douman 2015-ci ildən "Arsenal" sistemindədir. O, ötən il klubun əsas komandasında debüt edib. Gənc yarımmüdafiəçi həmçinin İngiltərənin U-19 millisinin də üzvüdür.
