Bizimyol saytından alınan məlumata görə, ain.az bildirir.
Martın 14-nə keçən gecə Ukrayna Müdafiə Qüvvələri Kerç bərə keçidinin əsas elementləri sayılan iki Rusiya hərbi gəmisini — “Slavyanin” bərəsini və “Avanqard” gəmisini vurub.
Bizimyol.info xəbər verir ki, bu barədə Ukrayna Müdafiə Nazirliyinin Baş Kəşfiyyat İdarəsi məlumat yayıb.
Məlumata görə, martın 13-dən 14-nə keçən gecə Baş Kəşfiyyat İdarəsinin Aktiv Əməliyyatlar İdarəsinin mütəxəssisləri Rusiyaya məxsus iki hərbi gəmini uğurla hədəfə alıblar. Əməliyyat nəticəsində “Slavyanin” qatar-bərəsi sıradan çıxarılıb, Ukraynaya qarşı müharibədə istifadə olunan “Avanqard” gəmisi isə zədələnib.
Kəşfiyyatın bildirdiyinə görə, bu gəmilər Kerç bərə keçidinin əsas hissəsi sayılırdı və düşmənin dəniz hərbi-logistika sistemində mühüm rol oynayırdı. Onlardan xüsusilə silahların, hərbi texnikanın və sursatın daşınması üçün istifadə olunurdu.
Əməliyyat çərçivəsində Ukrayna hərbi kəşfiyyatının xüsusi təyinatlıları Müdafiə Qüvvələrinin digər bölmələri ilə birlikdə Rusiyanın Krasnodar diyarında yerləşən “Kavkaz” limanının infrastrukturuna da atəş zərbəsi endiriblər. Məhz bu liman Rusiya tərəfindən Ukraynaya qarşı müharibə aparmaq üçün istifadə olunur.
Eyni zamanda Ukrayna Silahlı Qüvvələrinin Xüsusi Əməliyyat Qüvvələri bildirib ki, onların Dərin Hücum bölmələri Kerç boğazının Rusiya tərəfində yerləşən Çuşka qəsəbəsindəki “Kavkaz” dəniz limanını da hədəfə alıb. Rusiya bu limandan müvəqqəti işğal olunmuş Krımla logistika əlaqələri üçün istifadə edir. Liman cəbhə xəttindən təxminən 300 kilometr məsafədə yerləşir.
Ukrayna hərbçilərinin sözlərinə görə, liman ərazisində körpülər, bərə kompleksi, eləcə də taxıl, neft məhsulları və kimyəvi yüklərin emalı üçün terminallar fəaliyyət göstərir. Rusiya bu limandan həm ixrac-idxal əməliyyatları, həm də böyük tonnajlı gəmilərin daşınması üçün istifadə edir.
Xatırladaq ki, daha əvvəl — martın əvvəlində Ukrayna Müdafiə Qüvvələri Novorossiyskdəki Rusiya hərbi-dəniz bazasına hücum etmiş və “Kalibr” qanadlı raketlərini daşıyan “Admiral Essen” freqatına zərər yetirmişdi.
Ukrayna Hərbi Dəniz Qüvvələrinin sözçüsü Dmitri Pletençuk bildirib ki, ruslar böyük ehtimalla freqatı bərpa etməyə çalışacaqlar. Lakin Azov-Qara dəniz bölgəsində lazımi dokların olmaması səbəbindən bunun necə həyata keçiriləcəyi sual altında qalır. Onun sözlərinə görə, gəmi ya yolda təmir edilməli olacaq, ya da bəzi funksiyalarını itirə bilər.
Qadir, Bizimyol.info
Ən son xəbərləri və yenilikləri almaq üçün ain.az saytını izləyin.
