Azpost portalından verilən məlumata görə, ain.az xəbər yayır.
Oteli seçmək ilk baxışdan sadə görünür: gözəl şəkillər, münasib qiymət və əlverişli yerləşmə. Lakin təcrübəli səyyahlar yaxşı bilirlər ki, bəzən məhz bu cür detallər oteldə ciddi problemlərin gizləndiyini göstərə bilər. AzPost xəbər verir ki, bu barədə səyahət üzrə mütəxəssis və “Descubriendo Viajes” turizm platformasının qurucusu Xavyer Sobrino Daily Express nəşrinə danışıb.
Mütəxəssis bildirir ki, bəzi hallarda turistlər yalnız qiymətə və şəkillərə baxaraq otel seçirlər. Lakin bron etməzdən əvvəl bir neçə vacib məqama diqqət yetirmək lazımdır.
Hava limanı yaxınlığındakı otellər
Bir çox turist rahatlıq üçün hava limanına yaxın otelləri seçir. Ancaq bu seçim yalnız uçuş çox erkən olduqda məntiqli sayılır. Əks halda səyyahlar səfərin son axşamını şəhərin ab-havasını hiss etmək, yerli mətbəxi dadmaq və gəzmək əvəzinə sadə otel otağında keçirirlər. Üstəlik, belə otellər adətən turistik ərazilərdən uzaqda yerləşir və ətrafda əyləncə və ya xidmət imkanları az olur.
Şübhəli dərəcədə ucuz “hər şey daxil” istirahət paketləri
“Hər şey daxil” sistemi sərfəli ola bilər, lakin qiymət həddindən artıq aşağıdırsa, bu bəzən problemlərdən xəbər verir. Belə otellərdə turistlər tez-tez keyfiyyətsiz yeməklər, aşağı səviyyəli içkilər, gigiyena problemləri və ləğv olunan əyləncə proqramları ilə qarşılaşırlar. Mütəxəssis tövsiyə edir ki, qonaqların rəyləri diqqətlə oxunsun. Əgər qonaqların 25 faizindən azı oteli “əla” qiymətləndiribsə, bu artıq ciddi xəbərdarlıq sayılır.
Magistral yolların yaxınlığında yerləşən təcrid olunmuş otellər
Şəkillərdə belə otellər cəlbedici görünə bilər. Lakin əslində onlar çox vaxt səs-küylü yolların və ya yük maşınlarının dayanacaqlarının yanında yerləşir. Bu isə nəqliyyat səs-küyü, yaxınlıqda kafe və restoranların olmaması, bahalı taksi xərcləri və şəhərdən təcrid olunmuş mühit kimi problemlərə səbəb olur.
Təmir gedən otellər
Bəzi otellər təmir işləri səbəbindən endirimli qiymətlər təklif edir. Lakin bu işlərin miqyası hər zaman açıq şəkildə göstərilmir. Nəticədə turistlər səhər tezdən tikinti səsi, bağlı hovuz və restoranlar, həmçinin xidmətlərin məhdud olması ilə qarşılaşa bilərlər. Mütəxəssislər bron etməzdən əvvəl otelə yazaraq təmir barədə ətraflı məlumat almağı tövsiyə edirlər.
Nüfuzlu ərazilərdə həddindən artıq ucuz otellər
Bəzən məşhur və bahalı ərazilərdə çox ucuz qiymət təklif edən otellər də şübhə doğura bilər. Bu cür hallarda köhnəlmiş otaqlar, gizli ödənişlər və zəif xidmət kimi problemlər ortaya çıxa bilər.
Ekspertin sözlərinə görə, yaxşı otel mütləq bahalı olmalı deyil. Əsas məsələ qiymətin göstərilən xidmətlə uyğun olması və qonaqlara həqiqi qonaqpərvərlik təqdim edilməsidir. Buna görə də oteli bron etməzdən əvvəl yalnız şəkillərə və qiymətə deyil, həm də rəylərə, yerləşməyə və xidmət detallərinə diqqətlə baxmaq vacibdir. Bəzən bir neçə dəqiqəlik yoxlama bütün səfəri xilas edə bilər.
AzPost.az
Paylaş
Hadisənin gedişatını izləmək üçün ain.az saytında ən son yeniliklərə baxın.
