Vaşinqton yaxın vaxtlarda hərbi nəzarət bərpa olunarsa, beynəlxalq koalisiya ilə birlikdə tankerlərin boğazdan təhlükəsiz keçidini təmin etməyi planlaşdırır...
Poliqon xəbər verir ki, bu barədə Sky News telekanalı ABŞ rəsmilərinin açıqlamalarına istinadən məlumat yayıb. Bildirilib ki, ABŞ Hərbi Dəniz Qüvvələri yaxın vaxtlarda Hörmüz boğazından keçən gəmiləri müşayiət etməyə başlaya bilər. Bu prosesin mümkün olduqda beynəlxalq koalisiya çərçivəsində həyata keçirilməsi nəzərdə tutulur.
ABŞ-nin maliyyə naziri Skott Bessentin sözlərinə görə, hərbi müşayiət əməliyyatları yalnız ABŞ qüvvələri regionun hava məkanına tam nəzarət əldə etdikdən sonra həyata keçirilə bilər. O qeyd edib ki, belə əməliyyatlar “hərbi baxımdan mümkün olan kimi” başlanacaq.
Bessent həmçinin bildirib ki, İranla müharibə nəticəsində yaranan enerji təchizatı böhranı artıq ABŞ iqtisadiyyatına ciddi maliyyə zərəri vurub. Onun sözlərinə görə, münaqişə nəticəsində yaranan “tarixin ən böyük neft tədarükü pozuntusu” ABŞ-yə təxminən 11 milyard dollar başa gəlib.
Nazir əlavə edib ki, bəzi İran tankerləri və Çin bayrağı altında üzən bir neçə tanker artıq Hörmüz boğazından keçə bilib. Bu fakt Vaşinqtonun qiymətləndirməsinə görə, İranın boğazı minalamadığını göstərir.
ABŞ-nin energetika naziri Kris Rayt isə CNBC telekanalına müsahibəsində bildirib ki, Hörmüz boğazında gəmilərin hərbi müşayiəti “nisbətən yaxın zamanda” həyata keçirilə bilər. Bununla belə, o vurğulayıb ki, hazırda təhlükəsizlik və hərbi vəziyyət səbəbindən bu əməliyyatları dərhal başlamaq mümkün deyil.
Raytın qiymətləndirməsinə görə, tankerlərin hərbi müşayiəti ilə bağlı əməliyyatlar mart ayının sonuna doğru başlaya bilər.
Ekspertlər qeyd edirlər ki, Hörmüz boğazı dünya enerji tədarükünün ən vacib tranzit marşrutlarından biridir və burada yaranan hər hansı təhlükəsizlik problemi qlobal enerji bazarlarına ciddi təsir göstərir. ABŞ və müttəfiqlərinin planlaşdırdığı hərbi müşayiət mexanizmi beynəlxalq enerji daşımalarının təhlükəsizliyini təmin etmək məqsədi daşıyır.
Poliqon.info
