Neft qiymətləri əvvəlki sessiyanın sonunda 2022-ci ildən bəri ən yüksək səviyyəyə çatdıqdan sonra Cümə günü bir qədər aşağı düşüb.
"Yeni Sabah" Interfax-a istinadla xəbər verir ki, Yaxın Şərqdə hərbi əməliyyatlar davam edir və region ölkələri Hörmüz boğazından neft ixrac edə bilməməsi və nəticədə anbarların doldurulması səbəbindən hasilatı məhdudlaşdırmaq məcburiyyətində qalırlar.
İranın yeni Ali Lideri Müctəba Xamenei martın 12-dən Tehranın blokadaya son qoymaq niyyətində olmadığını və bundan təzyiq vasitəsi kimi istifadə etməyə davam edəcəyini bildirib.
ABŞ-nin enerji naziri Kris Rayt CNBC-yə verdiyi müsahibədə bildirib ki, Birləşmiş Ştatlar hələlik tankerləri Hörmüz boğazından keçirməyə hazır deyil, lakin çox güman ki, ayın sonuna qədər bunu edə biləcək.
London "ICE Futures" Birjasında may ayı üçün "Brent" markalı xam neftin fyuçerslərinin qiyməti 100,35 dollar təşkil edib. Cümə axşamı günü bu müqavilələr 8,48 dollar (9,2%) artaraq barel üçün 100,46 dollara çatıb. Bu, 2020-ci ilin may ayından bəri ən yüksək göstəricidir. "Brent" 2022-ci ilin avqust ayından bəri ilk dəfə barel üçün 100 dollardan yuxarı bahalaşıb.
Nyu-York Ticarət Birjasının (NYMEX) elektron ticarətində aprel ayı üçün WTI xam neft fyuçersləri 0,35 dollar (0,37%) azalaraq barel üçün 95,38 dollara çatıb. Onlar əvvəlki sessiyada barel üçün 8,48 dollar (9,7%) artaraq 95,73 dollara çatmışdılar ki, bu da 2022-ci ilin avqust ayından bəri ən yüksək göstəricidir.
ABŞ Maliyyə Nazirliyinin Xarici Aktivlərə Nəzarət İdarəsi (OFAC) Rusiya Federasiyasına xam neft və neft məhsullarının 30 gün müddətinə satışına icazə verən ümumi lisenziya verib. Lakin bu addım daha geniş təchizat problemini həll etmir.
LSEG analitiki Emril Cəmil qeyd edir ki, "Rusiya xam neftinin tədarükündə güzəştlər və ehtiyatlardan xam neftin misli görünməmiş şəkildə azad edilməsi də daxil olmaqla, bazarı sakitləşdirmək cəhdlərinə baxmayaraq, Brent fyuçersləri barel üçün 100 dollardan yuxarıdır. Treyderlər bunları problemin əsasını həll etməyən qısamüddətli tədbirlər kimi görürlər."
Beynəlxalq Enerji Agentliyi (IEA) Yaxın Şərq münaqişəsi səbəbindən tədarükün pozulmasını qlobal neft bazarı tarixində ən pis adlandırıb. Bu həftə üzv ölkələr strateji ehtiyatlarından rekord həddə - 400 milyon barel neftin azad edilməsi barədə razılığa gəliblər.
Telegram kanalımız
