Düzdür, bu gün dünyada böyük və varlı ölkələr çoxdur. Və bu böyük və varlı ölkələr dünya siyasətinə, iqtisadiyyatına və eləcə də gündəlik həyat tərzinə diqtə etməyi bacarır. Başqa sözlə demiş olsaq, dünyanın nəhəng dövlətləri öncə özlərinin maddi və mənəvi maraqlarını güdür və kiçik ölkələrə bir çox halda yuxarıdan aşağı baxırlar. Yəni onlar düşünürlər ki, həmin dövlət iqtisadi və hərbi cəhətdən güclüdürsə, digər kiçik və zəif ölkələr onların dediyi ilə oturub-durmalı, el dilində demiş olsaq, çaldıqları havaya oynamalıdırlar.
Amma Azərbaycan kiçik ölkə olsa da heç vaxt kiməsə, hansısa dövlətəsə yuxarıdan-aşağı baxmayıb, dünyanın bütün dövlətləri ilə isti, səmimi münasibət yaratmaq istəyib. Hansı ki dünyanın böyük ölkələri Azərbaycanın ərazisi 20 faiz işğal olanda bizə heç bir kömək etməyib və dəstək olmayıb. Ən yaxşı halda onlar ikili standartla Azərbaycana yanaşıblar. Daha doğrusu, təcavüzkarın, işğalçının, qarətçinin yanında olublar.
Müstəqillik əldə ediləndən sonra Azərbaycan öz daxili imkanları hesabına həm iqtisadiyyatını qurmağa başladı, həm hərbi sahədə böyük islahatlar apardı və həm də işğal olunmuş 20 faiz torpağını azad etmək üçün çıxış yolları axtardı. Təbii ki, bunlar zaman-zaman əldə edildi. Amma sadəcə olaraq, ölkəmiz ağır və çətin günlər yaşadı. 30 ildə bir milyondan çox məcburi köçkünə və qaçqına şərait yaratmaqla bağlı ciddi addımlar atıldı. Bununla yanaşı, ölkənin iqtisadiyyatında yaranmış durğunluq, tənəzzül zaman-zaman aradan qaldırıldı. Dağ boyda yükü Azərbaycan öz gücü hesabına çəkdi və axırda da qüdrətli bir ölkə yaratdı.
Aydındır ki, Azərbaycanda Ulu Öndər Heydər Əliyev və prezident İlham Əliyev tərəfindən yaradılmış sabitlik, əmin-amanlıq istər-istəməz dünyanın inkişaf etmiş ölkələrinin böyük marağını yaratdı. Bu mənada ABŞ, Çin, Böyük Britaniya, İtaliya, Fransa, Rusiya, Bolqarıstan, Türkiyə, İran, Səudiyyə Ərəbistanı, Birləşmiş Ərəb Əmirlikləri, İordaniya və çox sayda digər ölkələr Azərbaycana birmənalı olaraq böyük maraq göstərdilər. Heç şübhəsiz, həmin ölkələr tərəfindən Azərbaycan iqtisadiyyatına yatırılmış investisiya bu əlaqələrin möhkəmlənməsində önəmli rol oynadı. Yəni həmin ölkələr gördülər ki, Cənubi Qafqzda ən sabit və sakit ölkə Azərbaycandır və buna görə də milyardlarla dollar məbləğində ölkəmizə neft-qaz sənayesində yatırımlar etdilər.
Bununla yanaşı, Fransanın, Türkiyənin, Rusiyanın böyük şirkətləri ölkəmizlə iqtisadi əlaqələr qurdular. İlk növbədə Böyük Britaniyanın BP şirkəti bu sahədə ilk addım atdı, külli miqdarda vəsait qoydu və bir müddətdən sonra onun bəhrəsini gördü. Hansı ki bizim düşmənlərimiz, daha doğrusu, Azərbaycandan xoşu gəlməyən ölkələr beynəlxalq təşkilatlarda dövlətimizə qarşı təxribatçı çıxışlar edir, ölkəmizə marağı olan dövlətləri bu yoldan çəkindirmək istəyirdilər. Amma illər keçdikcə Azərbaycan dünyaya daha sürətlə inteqrasiya olur, böyük iqtisadi layihələr geçəkləşdirir və dünyanın ən inkişaf etmiş ölkələri dövlətimizdən böyük xeyirlər görməyə başladılar.
Ərazi bütövlüyümüz tamamilə bərpa olunandan sonra Azərbaycanın beynəlxalq aləmdə nüfuzu daha da artdı. Bu da ondan irəli gəldi ki, ölkəmizin daha ərazi bütövlüyü ilə bağlı heç bir problemi qalmadı. Ona görə də həm beynəlxalq təşkilatlar, həm də böyük dövlətlər istər-istəməz bizimlə isti münasibətlər yaratdılar. Birləşmiş Millətlər Təşkilatının və ölkəmizin təşəbbüsü ilə Azərbaycanda çox mötəbər siyasi-iqtisadi və mədəni tədbirlər keçirildi. Hansı ki ən inkişaf etmiş ölkələrdə həmin tədbirlər keçirilərkən müəyyən problemlər yaranır və bu tədbirdə iştirak edən ölkələr narazı qalırdı. Ancaq Azərbaycanda dünya səviyyəli tədbirlərin keçirilməsindən BMT-nin baş katibi və dünyanı idarə edən super dövlətlər çox razı qaldılar.
Bu gün Azərbaycan kiçik dövlət olmağına baxmayaraq, dünyada gedən siyasi-iqtisadi və ekoloji problemlərə çox böyük dəstək olur. Hətta ərazilərində müharibə gedən Fələstin kimi, İran kimi yaxın dövlətlərə maddi və mənəvi köməklik göstərir.
Bu günlərdə ölkəmiz Cənab prezident İlham Əliyevin göstərişi ilə İranda müharibədən əziyyət çəkən insanlara tonlarla ərzaq, su, dərman və digər zəruri qida məhsulları göndərilib. Bütün bunlar onu göstərir ki, Azərbaycan sülhsevər dövlətdir və qonşu ölkələrdə, o cümlədən İranda müharibənin yaratdığı böhrana, fəsada laqeyd yanaşa bilmir və onlara öz humanitar yardımını göstərir. Axı bizim İranda 40 milyondan çox qan qardaşımız var. Onları bu çətin və ağır gündə heç vaxt tək buraxmaq olmaz.
Azərbaycan prezidenti İlham Əliyev və Türkiyənin prezidenti Rəcəb Tayyib Ərdoğan ABŞ-İsrail və İran müharibəsinin dayandırılması üçün bu gün hər cür vasitəçilik etməyə hazırdırlar. Çünki bu müharibənin uzanması birmənalı olaraq Yaxın Şərqdə, eləcə də Cənubi Qafqazda vəziyyəti gərginləşdirir və müharibənin genişlənməsinə şərait yaradır.
Ona görə də hər iki dövlət başçısı və eləcə də dünyanın digər tanınmış siyasətçiləri bəşəriyyət üçün böyük fəlakət törədə biləcək bu müharibənin qarşısının alınması üçün lazımi addımlar atır. Heç şübhəsiz, müharibə edən ölkələr də bu addımı qiymətləndirməli, minlərlə insanın məhv olmasına, şəhərlərin, qəsəbələrin dağılmasına imkan verməməlidirlər. Çünki heç vaxt müharibə bəşəriyyətə xeyir gətirməyib. Müharibə uşaqları yetim qoyub, anaları ağlar qoyub, şəhərləri və kəndləri viran günə salıb. Ona görə də bu gün dünyamıza müharibə yox, sülh və əmin-amanlıq lazımdır. Bax, Azərbaycanın dünyaya intqerasiya olunması onu deməyə əsas verir ki, bu gün ölkəmiz dünyada sülh, humanistlik və insanpərvərlik nümunəsi kimi tanınır!
Emil Faiqoğlu
Yazı Medianın İnkişafı Agentliyinin maliyyə dəstəyi ilə hazırlanıb.
