Azərbaycanda yol hərəkətinin tənzimlənməsi və inzibati cərimələrin tətbiqi mexanizmlərində növbəti dəyişiklik gündəmə gəlib. Son illər rəqəmsal idarəetmənin genişləndirilməsi və elektron xidmətlərin tətbiqi nəticəsində bir çox sahədə kağız sənədlərdən istifadə tədricən azaldılır. Bu proses yol hərəkəti sahəsində də özünü göstərir və yeni qanunvericilik təşəbbüsləri məhz bu istiqamətdə atılan addımlar kimi qiymətləndirilir.
Məlumata görə, parklanma qaydalarını pozan sürücülərlə bağlı tətbiq olunan prosedurlarda dəyişiklik edilməsi təklif olunur. “Yol hərəkəti haqqında” qanuna təklif edilən dəyişikliklərə görə, dayanma və ya durma, eləcə də parklanma qaydalarının pozulmasına görə tərtib edilən inzibati xəta haqqında qərarın surətinin avtomobilin ön şüşəsinə qoyulması tələbi aradan qaldırılır.
Hazırkı qaydalara əsasən, yol polisi tərəfindən parklanma və dayanma qaydalarının pozulması faktı qeydə alındıqda tərtib olunan inzibati protokolun və ya qərarın surəti sürücünün avtomobilinin ön şüşəsinə yerləşdirilir. Bu isə sürücünün cərimə ilə bağlı məlumatı birbaşa yerində əldə etməsinə imkan yaradırdı. Lakin yeni təklifə görə, bu praktika artıq tətbiq edilməyəcək.
Qanun layihəsində qeyd olunur ki, müasir texnoloji imkanların tətbiqi nəticəsində inzibati sənədlərin və qərarların sürücülərə çatdırılması real vaxt rejimində həyata keçirilə bilir. Bu səbəbdən də kağız formatda protokolların avtomobil üzərində yerləşdirilməsi zərurəti aradan qalxır. Yeni qaydalar tətbiq olunarsa, sürücülər cərimə və inzibati qərarlarla bağlı məlumatları elektron sistemlər vasitəsilə əldə edəcəklər.
Məsələ ilə bağlı NOCOMMENT.az-a danışan “Bakı Hüquq Şirkəti”nin rəhbəri hüquqşünas Natiq Ələsgərov bildirib ki, bu dəyişiklik əslində dövlət idarəçiliyində rəqəmsallaşma siyasətinin davamı kimi qiymətləndirilə bilər.
Onun sözlərinə görə, son illər bir çox inzibati prosedurlar elektron sistemlər üzərindən həyata keçirilir və kağız sənədlərin dövriyyəsi tədricən azaldılır:
“Yeni qayda tətbiq olunduğu halda sürücülər inzibati qərarlar barədə məlumatı müxtəlif elektron platformalar vasitəsilə əldə edə biləcəklər. Bu, həm mobil tətbiqlər, həm də dövlətin elektron xidmət sistemləri üzərindən mümkün olacaq. Artıq bir çox hallarda yol hərəkəti qaydalarının pozulması kameralar və digər texniki vasitələrlə qeydə alınır və məlumatlar dərhal elektron sistemə ötürülür. Bu halda sürücüyə protokolun fiziki surətinin təqdim edilməsi zəruri olmur. Elektron bildirişlər vasitəsilə sürücü cərimə haqqında məlumatı daha operativ şəkildə əldə edə bilir”.
Ekspert hesab edir ki, bu dəyişiklik müəyyən mənada sürücülər üçün də daha rahat mexanizm yarada bilər:
“Çünki bəzi hallarda avtomobilin ön şüşəsinə qoyulan sənədlər itir, külək və ya yağış nəticəsində yararsız hala düşür və ya başqa şəxslər tərəfindən götürülə bilərdi. Elektron sistem isə bu kimi problemləri aradan qaldırır. Sürücülər elektron bildiriş sistemlərini daha diqqətlə izləməlidirlər. Çünki fiziki sənəd təqdim olunmadığı halda bəzi sürücülər cərimə barədə məlumatı gec öyrənə bilər. Bu isə müəyyən hallarda cərimələrin vaxtında ödənilməməsi və əlavə hüquqi məsuliyyət riskləri yarada bilər. Bu dəyişiklik həm də inzibati prosedurların daha çevik və şəffaf həyata keçirilməsinə xidmət edir. Elektron sistemlər vasitəsilə bütün məlumatlar avtomatik şəkildə qeydə alınır və bu, həm hüquq-mühafizə orqanlarının, həm də vətəndaşların prosesləri daha rahat izləməsinə imkan verir. Gələcəkdə yol hərəkəti sahəsində digər inzibati proseslərin də tam elektron formata keçirilməsi mümkündür. Rəqəmsallaşma nəqliyyat sahəsində idarəetmənin daha effektiv qurulmasına və insan faktorunun azalmasına da müsbət təsir göstərə bilər”.
Tunar
NOCOMMENT.az
