“Son dövrlərdə mopedlər, skuterlər və elektro-sikletlərin sayının artması qanunvericilikdə müəyyən dəyişikliklərin edilməsini zəruri edib. Ötən il bu istiqamətdə bir sıra dəyişikliklər həyata keçirildi – həm yol hərəkəti haqqında qanunda, həm də inzibati xətalar məcəlləsində. Bu il isə birbaşa mopedlərlə bağlı yol hərəkəti qanununda yeniliklər tətbiq olunub”.
Bu sözləri SİA-ya açıqlamasında nəqliyyat eksperti Eldəniz Cəfərov deyib.
O bildirib ki, artıq moped idarə edən şəxslər üçün dövlət nömrə nişanı əldə etmək və sürücülük vəzifəsini yerinə yetirmək məcburidir:
“Gələcəkdə isə əgər bu sahədə yeni dəyişikliklərə ehtiyac yaranarsa, qanunvericilik yenidən nəzərdən keçiriləcək.
Hazırda elektro-sikletlər və mopedlər Bakı şəhərində geniş yayılmayıb. Əvvəllər bu vasitələr əsasən əyləncə və idman məqsədləri üçün istifadə olunurdu, nəqliyyat vasitəsi kimi geniş tətbiqi yox idi. Lakin zamanla tələblər dəyişir və bu növ nəqliyyat vasitələrinin sayı artarsa, qanunvericilikdə uyğun düzəlişlərin aparılması zəruridir. Bu, həm istifadəçilərin təhlükəsizliyini təmin etmək, həm də qayda pozuntularına qarşı müvafiq tədbirlər görmək baxımından vacibdir”.
Ayşən Vəli
