Cebheinfo portalından verilən məlumata görə, ain.az xəbər yayır.
Ermənistan Seçki Məcəlləsinə fevralın 7-də irəli sürülən dəyişikliklər qüvvəyə minib.
“Cebheinfo.az”-ın məlumatına görə, bu barədə Mərkəzi Seçki Komissiyasının sədri Vaahn Hovakimyan mətbuat konfransında açıqlama verib. Ermənistan Milli Məclisinə seçkilərlə bağlı düzəlişlərə əsasən, partiyalar üçün keçid barajı 4 faizə endirilib.
Seçki blokları üçün isə bu limit 8 və 10 faziə qaldırılıb. Qeyd edək ki, əvvəllər partiya blokları üçün seçki barajı 7 faiz təşkil edirdi. “Maksimum üç partiyadan ibarət bloklar 8 faizlik həddi, üç və ya daha çox partiyadan ibarət bloklar isə 10 faizlik barajı aşmalıdır”,-deyə MSK sədri bildirib.
Digər dəyişiklik seçki depoziti ilə bağlıdır. Partiyalar üçün bu məbləğ 10 milyondan 7,5 milyon drama endirilib, seçki blokları üçün isə həmin vəsait 15 milyon dram müəyyən edilib. “Bu, qanunvericiliyin siyasi qüvvələrin konsolidasiyasını asanlaşdırması, oxşar ideologiyalara malik partiyaların birləşməyə daha çox meylli olması və partiyaların özlərinin daha da böyüməsi üçün edilir”,- deyə Hovakimyan əlavə edib.
Qeyd edək ki, əvvəllər Ermənistan qanunvericiliyi üçdən çox siyasi qüvvədən ibarət seçki bloklarının yaradılmasını qadağan edirdi. Seçki Məcəlləsinə edilən dəyişikliklər bu qadağanı aradan qaldırıb.
Lakin seçki barajının artırılması müxalifətdən olan partiya bloklarının mandat qazanmaq şansını azaldacaq. Müxalifət partiyalarının reytinq göstəricilərinin aşağı olduğunu nəzərə alsaq, hakimiyyətin alternativləri üçün 8 və 10 faizlik barajları keçmək asan olmayacaq.
Ona görə də müxalifət partiyaları seçkilərə blok şəklində deyil, fərdi qaydada getməyə üstünlük verə bilər. Bu da müxalifət sıralarında parçalanmanı artıracaq. Rəy sorğuları hazırda parlamentdə təmsil olunan və eks-prezident Robert Köçəryana bağlı “Ermənistan” blokuna səs vermək istəyənlərin 6,8 faizdən 5 faizə düşdüyünü göstərir.
Bu halda “Ermənistan” blokunun 8 faizlik barajı keçməsi çox çətin olacaq. Milli Məclisdə 5 ildir Robert Köçəryanı təmsil edən “Daşnaksütyun” Erməni İnqilabi Federasiyanın reytinqi isə 1 faiz civarındadır.
Daşnaklar ayrılıqda seçkilərə getməli olsalar, ümumiyyətlə deputat yeri qazana bilməyəcəklər. Robert Köçəryanın “Daşnaksütyun” İdarə Heyətinin üzvü İşxan Saqatelyanı namizədlərin proporsional siyahısında ön sırada görmək istəyi onların yeganə ümid yeri ola bilər.
Rusiyalı milyarder və hazırda həbsdə olan Samvel Karapetyanın liderlik etdiyi “Güclü Ermənistan” Partiyası üçün 4 faizlik barajı aşmaq daha asan olacaq. Son rəy sorğuları Samvel Karapetyanın partiyasına səs vermək istəyənlərin sayının 10 faizə yaxın olduğunu göstərir.
Ona görə də müxalifət düşərgəsində ən çox mandat qazanmaq şansı “Güclü Ermənistan”a məxsusdur. Seçki Məcəlləsinə edilən dəyişikliklər sabiq prezident Serj Sarkisyanın tərəfdarlarından ibarət “Şərəfim var” blokunun növbəti parlamentə düşmək imkanının olmadığını deməyə əsas verir.
Hazırda cəmi 6 deputatla təmsil olunan bu bloka sorğularda səs vermək istəyənlərin sayı 2 faizdən azdır. Ona görə də “Şərəfim var” bloku üçün 8 faizlik barajı keçmək real görünmür. Çox güman ki, Serj Sarkisyan seçkilərə bu dəfə blok şəklində deyil, sədrlik etdiyi Ermənistan Respublika Partiyası ilə gedəcək.
Partiyanın aprel ayında keçiriləcək qurultayında baş nazirliyə Armen Aşotyanın namizədliyini irəli sürəcəyi gözlənilən Sarkisyanın sədr postundan istefa verəcəyi də istisna olunmur.
Eks-prezidentin bu yolla 4 faizlik limiti keçməyə və hazırda liderlik etdiyi partiyaya mandat qazandırmağa çalışacağı güman edilir. Ancaq ERP-nin parlamentə düşmək ehtimalı çox aşağıdır.
Müşfiq Abdulla
“Cebheinfo.az”
Açar sözlər:
Seçki Məcəlləsi Ermənistan
Problemlərinizi bizə yazın, şahidi olduğunuz hadisələri çəkib göndərin
Hadisənin gedişatını izləmək üçün ain.az saytında ən son yeniliklərə baxın.
