Zrenyanin, 11 mart, AZƏRTAC
Yarış mənim üçün çox maraqlı keçdi.
AZƏRTAC xəbər verir ki, bu sözləri Serbiyanın Zrenyanin şəhərində təşkil edilən U-23 Avropa çempionatında bürünc medal qazanan Azərbaycanın sərbəst güləşçisi Musa Ağayev deyib.
65 kiloqramda çıxış edən idmançı çoxlu səhv etdiyi üçün finala vəsiqə qazanmadığını bildirib: "Üçüncü yer uğrunda erməni rəqibimlə qarşılaşdım və son saniyələrdə qalib gəldim. Şükürlər olsun ki, Vətənə medalsız dönməyəcəyəm. Gələcək hədəfim 2028-ci ildə Los-Ancelesdə təşkil olunacaq Olimpiya Oyunlarına vəsiqə qazanıb, qızıl medal əldə etməkdir".
Müxbir: Cavid Əliyev
