ain.az, Azertag portalına istinadən məlumatı açıqlayır.
Bakı, 11 mart, AZƏRTAC
Çinin “China Global Television Network” (CGTN) beynəlxalq televiziya kanalı Azərbaycanın beynəlxalq infrastruktur layihələrinin inkişafında və “Bir kəmər, bir yol” təşəbbüsü çərçivəsində iqtisadi inteqrasiyada artan roluna həsr olunmuş süjet yayımlayıb.
Süjetin əsasını Azərbaycan Dövlət İnformasiya Agentliyinin (AZƏRTAC) əməkdaşı Tamilla Məmmədovanın müsahibəsi təşkil edib.
Videomaterialda vurğulanır ki, Azərbaycan hazırda Avrasiyanın əsas nəqliyyat-logistika qovşaqlarından biridir. Ölkə Çin, Qazaxıstan, Xəzər dənizi, Azərbaycan, Gürcüstan və Türkiyəni birləşdirən Orta dəhliz kimi tanınan Trans-Xəzər Beynəlxalq Nəqliyyat Marşrutuna fəal şəkildə inteqrasiya olunub. Bu marşrut yüklərin Avropaya daşınması üçün ənənəvi dəniz yolları ilə müqayisədə daha qısa və təhlükəsiz yol təmin edir. Bu da Azərbaycanın beynəlxalq ticarətdə mühüm tranzit halqaya çevrilməsinə imkan yaradır.
Süjetdə qeyd olunur ki, marşrutun inkişaf dinamikası heyrətamizdir. Belə ki, 2024-cü ildə Çindən Azərbaycana təxminən 287 konteyner qatarı göndərilib ki, bu da əvvəlki illə müqayisədə 80 faizdən çox artım deməkdir. Nəqliyyat dəhlizinin möhkəmləndirilməsində iri infrastruktur layihələri mühüm rol oynayır. Onların sırasında Bakı–Tbilisi–Qars dəmir yolu, Bakı və Qazaxıstanın Aktau şəhərində liman infrastrukturunun modernləşdirilməsi, həmçinin müasir logistika komplekslərinin yaradılması var.
Qeyd olunur ki, bu layihələrin həyata keçirilməsi nəqliyyat məsafələrinin minlərlə kilometr azalmasına və Asiya ilə Avropa arasında yüklərin daha qısa müddətdə çatdırılmasına imkan yaradır. Bu isə biznes və beynəlxalq ticarət üçün yeni imkanlar açır.
Müsahibədə həmçinin vurğulanır ki, Çin Azərbaycanla əməkdaşlığı yalnız nəqliyyat sahəsində deyil, energetika, bərpaolunan enerji mənbələrinin inkişafı və iqtisadiyyatın rəqəmsallaşdırılması istiqamətlərində də genişləndirir. Bu, iki ölkə arasında iqtisadi əlaqələrin möhkəmlənməsinə və sənaye əməkdaşlığı üçün yeni imkanların yaranmasına şərait yaradır.
Videoreportajın müəllifinin sözlərinə görə, Azərbaycanın “Bir kəmər, bir yol” təşəbbüsündə iştirakı ölkənin regional tranzit qovşağı kimi mövqeyini daha da gücləndirir. Bu, həmçinin yeni iş yerlərinin yaradılmasına və xarici investisiyaların cəlb olunmasına töhfə verir. Uzunmüddətli perspektivdə Azərbaycan beynəlxalq tədarük zəncirlərinin formalaşmasında, logistika və sənayenin inkişafında tamhüquqlu tərəfdaşa çevrilir. Bu isə regionun iqtisadi inteqrasiyasına və dayanıqlı iqtisadi artımına birbaşa töhfə verir.
Qeyd edək ki, son illərdə AZƏRTAC Çinin aparıcı media qurumları ilə əməkdaşlığı fəal şəkildə inkişaf etdirir. Agentlik Sinxua, “China Daily” və CGTN telekanalının da tərkibinə daxil olduğu “China Media Group” kimi iri media strukturları ilə əməkdaşlıq edir. Bu əməkdaşlıq xəbər materiallarının mübadiləsini, birgə informasiya layihələrinin həyata keçirilməsini və beynəlxalq media təşəbbüslərində iştirakı əhatə edir. Bu isə Azərbaycanın qlobal informasiya məkanında mövqeyinin genişlənməsinə və Bakı ilə Pekin arasında media əlaqələrinin daha da möhkəmlənməsinə xidmət edir.
CGTN-in tam materialı aşağıdakı keçiddə təqdim olunur:
https://news.cgtn.com/news/2026-03-10/China-s-infrastructure-investment-drives-international-integration-1Lp9nJvK9A4/p.html
Daha ətraflı məlumat və yeniliklər üçün ain.az saytını izləyin.
