ain.az xəbər verir, Oxu.az saytına əsaslanaraq.
Yaxın Şərqdə alovlanan genişmiqyaslı münaqişə fonunda İranın idman naziri Əhməd Donyamali milli komandanın bu yay ABŞ, Meksika və Kanadanın ev sahibliyi edəcəyi 2026-cı il dünya çempionatında iştirak etməyəcəyini bəyan edib. Bu qərar fevralın 28-də ABŞ və İsrailin İrana qarşı başlatdığı hava hücumları və İslam Respublikasının buna cavab olaraq İsrailə, eləcə də Fars körfəzi və qonşu ölkələrə raket və dron zərbələri endirməsindən sonra qəbul edilib.
Oxu.Az-ın xəbərinə görə, nazirin bu barədə səsləndirdiyi fikirləri "TV2" telekanalı yayımlayıb.
"Hökumət liderimizi qətlə yetirdikdən sonra dünya çempionatına qatılmaq üçün heç bir zəmin qalmayıb. İrana qarşı törədilən vəhşi hücumları - cəmi səkkiz-doqquz ay ərzində iki müharibənin baş verməsini və minlərlə həmvətənimizin həyatını itirməsini nəzərə alsaq, mövcud şəraitdə turnirdə iştirak etmək imkanımız xaricindədir", - deyə Donyamali vurğulayıb.
Xatırladaq ki, fevralın 28-də İsrailin müdafiə naziri İsrael Katz İsrail Müdafiə Qüvvələrinin İrana qarşı qabaqlayıcı zərbələr endirdiyini elan edib. "Şir nərəsi" adı verilən hərbi əməliyyat çərçivəsində İranın paytaxtı Tehran da daxil olmaqla, iri şəhərləri hədəfə alınıb. Gərginliyin artması ilə hər iki ölkə öz hava məkanını uçuşlar üçün bağlayıb. Ardınca ABŞ prezidenti Donald Tramp Vaşinqtonun da İrana qarşı hərbi əməliyyatlara qoşulduğunu təsdiqləyib. Pentaqon tərəfindən bu əməliyyat "Epik Qəzəb" adlandırılıb. Buna cavab olaraq İran tərəfi İsrail ərazisinə onlarla ballistik raket atıb.
Bununla yanaşı, İran Yaxın Şərqdə - Qətər, BƏƏ, Bəhreyn, İraq, Səudiyyə Ərəbistanı və İordaniyada yerləşən Amerika hərbi bazalarına da pilotsuz uçuş aparatları və raketlərlə zərbələr endirib. Hazırda bu dövlətlərin, həmçinin İsrail və Türkiyənin hava məkanında uçuşlar dayandırılıb. İslam Respublikası öz əməliyyatına "Əsl Vəd 4" adını verib. Yaxın Şərqdə başlayan bu genişmiqyaslı hərbi əməliyyatlar nəticəsində artıq 1300-dən çox insan həyatını itirib. Qurbanların böyük əksəriyyəti İran vətəndaşları olsa da, həlak olanlar arasında Bəhreyn, İsrail, Küveyt, Livan və BƏƏ sakinləri, eləcə də bir neçə Amerika hərbçisi də var.
Qeyd edək ki, martın 1-də İslam Respublikasının dövlət televiziyası ölkənin Ali Rəhbəri Əli Xameneinin öldürüldüyünü rəsmən açıqlayıb. Həmçinin, Ayətullah Əli Şamxaninin müşaviri, İslam İnqilabı Keşikçiləri Korpusunun (İİKK) komandiri Məhəmməd Pakpur və müdafiə naziri Əziz Nəsirzadə kimi bir sıra yüksək rütbəli İran hərbi rəsmilərinin də həlak olduğu təsdiqini tapıb.
Ən son yeniliklər və məlumatlar üçün ain.az saytını izləyin, biz hadisənin gedişatını izləyirik və ən aktual məlumatları təqdim edirik.
