Londonda qəbul edilən yeni qanun aristokratların yalnız mənşəyə əsaslanaraq parlamentin yuxarı palatasında təmsil olunması praktikasına son qoyur...
Poliqon xəbər verir ki, Böyük Britaniya parlamenti Lordlar Palatasında irsi lordların iştirak hüququnun ləğvini nəzərdə tutan tarixi qanun qəbul edib. Bununla da aristokratların yalnız doğum hüququ əsasında parlamentin yuxarı palatasında təmsil olunması ənənəsinə faktiki olaraq son qoyulub.
Qanunvericilər tərəfindən təsdiqlənən yeni hüquqi sənəd aristokrat mənşəyinə görə avtomatik şəkildə Lordlar Palatasında yer almaq imkanını aradan qaldırır. Britaniya hökuməti bildirib ki, bu qərar irsi imtiyazların mərhələli şəkildə ləğvi istiqamətində son 25 ildə aparılan islahatların yekun mərhələsini təşkil edir.
Hökumətin açıqlamasında qeyd olunub ki, qəbul edilən qanun son illərdə parlamentdə həyata keçirilmiş ən böyük siyasi və institusional dəyişikliklərdən biri hesab olunur. Sənədə əsasən, irsi pirlər (lordlar) artıq Lordlar Palatasında iştirak etmək və səsvermədə iştirak etmək hüququnu itirəcəklər.
Britaniya hakimiyyətinin mövqeyinə görə, siyasi proseslərdə iştirakın yalnız nəsil və aristokrat mənşə əsasında müəyyən edilməsi müasir demokratik standartlara uyğun deyil və artıq köhnəlmiş model sayılır. Rəsmi London hesab edir ki, parlamentin yuxarı palatasının formalaşdırılması daha şəffaf və meritokratiya prinsiplərinə uyğun olmalıdır.
Bununla yanaşı, hökumət islahatın qəbul edilməsi üçün müəyyən kompromis addım da atıb. Müxalifət və müstəqil deputatlarla razılaşma çərçivəsində irsi pərlərin əvəzinə onlara ömürlük pərlik titullarının verilməsi mexanizmi təklif olunub. Bu isə həmin şəxslərin parlament fəaliyyətində iştirakını davam etdirməsinə imkan yarada bilər.
Razılaşmaya əsasən, parlamentdəki müxalifət qüvvələri öz namizədlərini müəyyən edərək onlara ömürlük perlik titullarının verilməsi üçün təqdim edə biləcəklər. Bu titul irsi xarakter daşımayacaq və yalnız həmin şəxsin ömrü boyu qüvvədə olacaq.
Yeni qaydaların Böyük Britaniya parlamentinin hazırkı qanunvericilik sessiyası başa çatdıqdan dərhal sonra qüvvəyə minəcəyi bildirilib. Ekspertlər hesab edirlər ki, bu addım Britaniya parlament sistemində daha demokratik və müasir idarəetmə modelinin formalaşdırılması istiqamətində mühüm mərhələ kimi qiymətləndirilir.
Poliqon.info
