Gündəlik badam istehlakı piylənməsi olan insanlarda orqanizmdə iltihab yaradan molekulların səviyyəsini azalda bilər. Bu nəticəyə ABŞ-dakı Missuri Universiteti alimləri gəliblər. Tədqiqatın nəticələri Nutrients jurnalında dərc olunub.
Altı həftə davam edən klinik araşdırmada 30–45 yaş arası piylənməsi olan 69 yetkin iştirak edib. İştirakçılar iki qrupa bölünüb. Birinci qrup hər gün 57 qram badam yeyib, ikinci qrup isə kalorisi təxminən eyni olan peçenye ilə qəlyanaltı edib. Bununla yanaşı, bütün könüllülər adi qidalanma rejimini və həyat tərzini dəyişməyiblər.
Altı həftədən sonra mütəmadi badam yeyən iştirakçıların qanında bir neçə iltihab molekulunun — IL-6, TNF-α və IFN-γ — səviyyəsi azalıb. Bu maddələr xroniki iltihabla əlaqələndirilir və belə iltihab tez-tez piylənmə ilə müşayiət olunur, həmçinin diabet və ürək-damar xəstəlikləri riskini artırır.
Araşdırma müddətində iştirakçıların bədən çəkisi, qanda qlükoza səviyyəsi, xolesterin göstəriciləri və arterial təzyiqində isə ciddi dəyişiklik qeydə alınmayıb.
Tədqiqatçıların sözlərinə görə, badamın iltihabəleyhinə təsiri onun tərkibi ilə bağlı ola bilər. Bu qoz növü doymamış yağlar, qida lifləri, E vitamini və immun sistemini dəstəkləyərək iltihab proseslərini azalda bilən bir sıra minerallarla zəngindir.
Müəlliflər qeyd edirlər ki, badamın gündəlik rasiona daxil edilməsi piylənmə ilə əlaqəli iltihabı azaltmaq üçün sadə pəhriz yanaşması ola bilər. Lakin bu təsirin tam təsdiqlənməsi üçün daha uzunmüddətli və genişmiqyaslı tədqiqatlara ehtiyac var.
