ABŞ Prezidenti Donald Trump, neft qiymətlərinin 100 dolları keçdiyi və İranla müharibənin 10-cu gününə daxil olduğu bir vaxtda, münaqişənin yaxın vaxtlarda sona çata biləcəyinə dair siqnal verib.
Tramp bazar ertəsi CBS News telekanalına telefonla verdiyi müsahibədə bildirib ki, ABŞ-ın İrana qarşı apardığı hərbi əməliyyatlar gözləniləndən daha sürətli irəliləyir.
“Düşünürəm ki, müharibə böyük ölçüdə tamamlanıb,” – deyə Tramp qeyd edib.
Onun sözlərinə görə, əməliyyatların əvvəlcə 4–5 həftə davam edəcəyi proqnozlaşdırılsa da, proses planlaşdırılandan daha tez irəliləyib.
ABŞ prezidenti İranın hərbi imkanlarının ciddi şəkildə zəiflədiyini də vurğulayıb.
“Onların donanması yoxdur, rabitə sistemləri yoxdur, hava qüvvələri də yoxdur,” – deyə Tramp bildirib.
Bu açıqlamalar Yaxın Şərqdə gərginliyin davam etdiyi və enerji bazarlarında kəskin dalğalanmaların müşahidə olunduğu bir vaxta təsadüf edir. Geosiyasi risklərin artması fonunda qlobal bazarlarda xüsusilə neft və qaz qiymətlərində ciddi yüksəliş qeydə alınır.
Trampın açıqlamasından sonra Brent neftinin qiyməti 87 dollara qədər düşüb. Bu gün səhər neftin qiyməti 119 dolları keçmişdi.
