Stokholm Beynəlxalq Sülh Araşdırmaları İnstitutunun (SIPRI) qlobal silah transferlərinə dair son hesabatına görə, Avropa uzun müddətdən sonra qlobal müdafiə bazarında bir nömrəli idxalçı mövqeyinə yüksəlib.
AFN.az xəbər verir ki, son 5 ildə silah idxalını 210 faiz artıran qitə, 1960-cı illərdən bəri ilk dəfə qlobal bazarda 33 faizlik pay ilə birinci pilləyə yerləşib.
Hesabatda 2021-2025-ci illər dövrü üçün qlobal silah bazarının mənzərəsi belə təsvir olunub:
Avropa: 33% (Lider);
Asiya və Okeaniya: 31%;
Yaxın Şərq: 26%.
Rusiya-Ukrayna müharibəsi fonunda müdafiə investisiyalarını sürətləndirən Avropa dövlətləri xüsusilə qırıcı təyyarələr və hava hücumundan müdafiə sistemləri sahəsində ABŞ texnologiyasından asılılığını qoruyub. ABŞ təkbaşına dünya silah bazarının 42 faizinə nəzarət edərək mütləq hakimliyini davam etdirir.
İxracatçılar arasında Fransa öz mövqeyini möhkəmləndirərək ikinci, Almaniya isə Çini geridə qoyaraq dördüncü pilləyə yüksəlib. Əksinə, Rusiyanın silah ixracatı həcmi 64 faiz kimi rekord səviyyədə geriləyib. Dünyanın ən böyük silah idxalçıları siyahısına isə Ukrayna başçılıq edir, onu Hindistan və Səudiyyə Ərəbistanı izləyir.
SIPRI mütəxəssisləri vurğulayırlar ki, Tramp administrasiyasının "Öncə Amerika Silah Transfer Strategiyası" çərçivəsində silah satışı həm iqtisadi güc, həm də strateji xarici siyasət aləti kimi istifadə olunur.
