Şamaxı” Azərbaycan Premyer Liqasının 23-cü turu çərçivəsində “İmişli”ni qəbul edib. Matç qolsuz heç-heçə ilə yekunlaşıb.
Msport.az xəbər verir ki, meydan sahiblərinin baş məşqçisi Ayxan Abbasov mətbuat konfransında oyun barədə fikirlərini bölüşüb:
“Sıx qrafikdə oynayırdıq və son matçda aldığımız üzücü məğlubiyyət futbolçulara psixoloji tərəfdən ciddi təsir göstərmişdi. Buna baxmayaraq yorğun halda 90 dəqiqə ərzində yaxşı mübarizə apardıq. “İmişli” çempionatın ən çox heç-heçə edən komandasıdır. Rəqibə oynamağa imkan vermirlər, özləri də futbol oynamırlar. Bunu həm Qubada, həm də burada gördük. Yorğun olsaq da, turnir cədvəlindəki yerimizi qorumaq və yuxarı pillələrə iddiamızı saxlamaq üçün mühüm xalı qazandıq. Mübarizə davam edir”.
A.Abbasov “Şamaxı”nın Premyer Liqadakı mövqeyi və klubun imkanları barədə də fikirlərini bildirib:
“Futbolçularıma demişəm ki, əsas məqsədimiz Premyer Liqada qalmaq idi. Klubun böyüməsi üçün bu liqada stabil iştirak mütləqdir. Bizim bəlli büdcəmiz var və bizdən aşağı pillələrdə olan komandalardan böyük bir üstünlüyümüz və ya nəhəng bazamız yoxdur. Premyer Liqaya qayıtdığımızın ikinci ilində aşağı pillə həyəcanı yaşamamaq, gənclərə və yeni legionerlərə şans vermək yaxşı nəticədir. Kubokda da hədəfimiz var idi, lakin “Qarabağ” çox güclü rəqib idi. Bəlkə daha geniş heyətimiz və rotasiya imkanımız olsaydı, daha yaxşı nəticə göstərə bilərdik. Bundan sonrakı özümüz və futbolçuların gələcəyi üçün böyük motivasiyadır. Hər oyunda mübarizə aparacağıq.
“Mövsümün son dövrəsi yaxınlaşanda müxtəlif fikirlər və suallar yaranır. Lakin meydanda kimi oynadacağımız, heyətə kimləri daxil edəcəyimiz sırf mənə aid olan məsələlərdir. Bu mövzular rəhbərliklə müzakirə olunmur. Mənim öz yanaşmam və məqsədlərim var. Hər oyuna qələbə və futbolçuların inkişafı üçün çıxacağıq”.
