“Prezident İlham Əliyevin çıxışında və Azərbaycan Xarici İşlər Nazirliyinin verdiyi notada İranın təcavüzkar hərəkətlərinə qarşı sərt mövqe və reaksiyalar ortaya qoyulub. Azərbaycan tərəfi həmçinin Müdafiə Nazirliyi vasitəsilə, hərbi reaksiyanın da hazır olacağını vurğulayıb. Bütün bunlara baxmayaraq İrandan rəsmi cavabın gəlməməsi bir sıra aspektlərlə izah oluna bilər. İranın cavabsızlığı deyə biləcək bir bəhanəsinin olmamasından irəli gəlir”.
Bu sözləri Pravda.az-a politoloq Rəşad Bayramov İrandan hələ də rəsmi cavabın gəlməməsinə münasibət bildirərkən deyib.
Onun sözlərinə görə, bir dövlətin bu şəkildə reaksiyasız qalması bəzən onun vəziyyətin ciddiliyini qəbul etməməsi, yaxud da mövcud vəziyyəti daha da gərginləşdirməmək üçün hərəkət etməməsi ilə bağlı olur: “Lakin cavabsızlıq həm də etdiklərinə bəraət qazandırmaq üçün diplomatik cəhətdən hər hansı bir müdafiə arqumentinin olmaması anlamına da gələ bilər. İran Azərbaycan və Türkiyənin reaksiyalarına və beynəlxalq təzyiqlərə cavab vermirsə, bu, onun hərbi və diplomatik baxımdan çıxılmaz bir vəziyyətdə olduğunu və ya bu məsələyə qarşı duruş nümayiş etdirməkdən çəkinməsini göstərir. İranın cavab verməməsi, ümumilikdə, məsələyə yanaşmaqda gücsüz olduğunu və bu cür vəziyyətlərlə başa çıxmaq üçün effektiv bir strategiya tapa bilmədiyini əks etdirir. Başqa sözlə, bu cavabsızlıq onu göstərir ki, ölkə öz təcavüzkar hərəkətini açıq şəkildə müdafiə etməyə hazır deyil. Belə ki, İran belə bir zərbənin onun tərəfindən endirilmədiyini iddia edərsə, bu halda ortaya başqa bir ciddi sual çıxır: deməli, İran öz hərbi texnikasına və pilotsuz uçuş aparatlarına nəzarət edə bilmir. Bir dövlət öz ordusuna və hərbi texnikasına nəzarət edə bilmirsə, bu, həmin dövlət üçün son dərəcə ciddi və təhlükəli vəziyyət deməkdir. Bundan əlavə, İranın cavab verməməsi, bölgə daxilindəki qüvvələr balansının dəyişməsi ilə bağlı narahatlıqlarını da əks etdirə bilər. Həm Azərbaycan, həm də Türkiyə bu məsələdə sərt mövqe ortaya qoymuş və hər iki ölkə bir-birinə dəstək verəcəyini açıq şəkildə bəyan etmişdir. Bu isə İran üçün ciddi bir diplomatik sınaqdır”.
Şəhanə Quliyeva
