Hindistanın dövlətə məxsus neft emalı müəssisələri qısa müddətdə təxminən 20 milyon barel Rusiya nefti satın alıb...
Poliqon xəbər verir ki, Reuters Agentliyinin məlumatına görə, Hindistanın neft emalı zavodları təcili şəkildə Rusiyadan milyonlarla barel xam neft alır.
Mənbələrdən birinin sözlərinə görə, Hindistanın dövlətə məxsus neft emalı müəssisələri hazırda treyderlər vasitəsilə təxminən 20 milyon barel Rusiya nefti satın alıblar. Bu alışların qısa müddətdə həyata keçirildiyi bildirilir.
Ekspertlərin fikrincə, Hindistanın bu addımı qlobal enerji bazarında artan qeyri-müəyyənlik və Yaxın Şərqdəki münaqişənin neft tədarükünə təsir göstərməsi ilə əlaqədardır. Enerji təhlükəsizliyini təmin etmək üçün bir sıra ölkələr alternativ mənbələrdən neft alışını artırmağa çalışır.
Analitiklər qeyd edirlər ki, Rusiya nefti adətən beynəlxalq bazardakı analoji məhsullardan daha ucuz satıldığı üçün Hindistan kimi böyük idxalçı ölkələr üçün cəlbedici olaraq qalır. Bu isə Moskvanın sanksiyalar fonunda belə enerji ixracını davam etdirməsinə imkan yaradır.
Mütəxəssislər hesab edirlər ki, Yaxın Şərqdə gərginliyin davam etməsi halında Asiya ölkələrinin, xüsusilə də Hindistanın Rusiya neftinə tələbatı daha da arta bilər.
Poliqon.info
