"Bu sərəncamın imzalanması müasir dövrün reallıqlarını nəzərə alan çox vacib bir addımdır. Çünki bu gün uşaqların həyatında rəqəmsal mühit artıq gündəlik həyatın ayrılmaz hissəsinə çevrilib. Onlar informasiya əldə edir, ünsiyyət qurur, öyrənir və vaxtlarının böyük hissəsini məhz onlayn mühitdə keçirirlər. Buna görə də bu mühitdə təhlükəsizliyin təmin olunması yalnız ailənin deyil, bütövlükdə cəmiyyətin və təhsil sisteminin də diqqət mərkəzində olmalıdır. Hazırda uşaqların rəqəmsal mühitdə qarşılaşa biləcəyi əsas risklər arasında zərərli və yaşa uyğun olmayan məzmun, kiberbullinq, şəxsi məlumatların paylaşılması ilə bağlı təhlükələr, müxtəlif manipulyativ və ya yanlış məlumatların təsiri kimi məsələlər xüsusi yer tutur".
Bu fikirləri Aznews.az-a açıqlamasında Elm və Təhsil Nazirliyi yanında İctimai Şuranın katibi Günay Əkbərova deyib.
Xatırladaq ki, 2026-cı il 27 fevral tarixində Prezident İlham Əliyev uşaqların rəqəmsal mühitdə zərərli məzmundan qorunması ilə bağlı sərəncam imzalayıb. Sərəncam çərçivəsində məktəb kurikulumlarına rəqəmsal savadlılıq, kibertəhlükəsizlik və məsuliyyətli onlayn davranış kimi mövzular daxil edilir, valideynlər və müəllimlər üçün maarifləndirmə proqramları həyata keçirilir.
G. Əkbərova bildirib ki, bəzi hallarda uşaqlar onlayn platformalarda qarşılaşdıqları məlumatların doğruluğunu müəyyənləşdirməkdə çətinlik çəkirlər.
