Rusiya tennisçiləri — Daniil Medvedev, Karen Xaçanov və Andrey Rublyov BƏƏ-ni tərk edərək Omandan İstanbula yola düşüblər. Bu barədə Rublyovun anası Marina Maryenko RİA Novosti-yə açıqlamasında bildirib.
Onun sözlərinə görə, Medvedev, Xaçanov və Rublyovun komandası üçün xüsusi reys təşkil olunub.
“Andreydən İstanbula çatması ilə bağlı zəng gözləyirəm. Komanda üçün xüsusi reys təşkil edilib. Saat 16:00-da Omandan uçublar, İstanbula çatmaları ilə bağlı zəng gözləyirəm. Oradan isə uşaqlar Los-Ancelesə yollanacaqlar. Dediklərinə görə, uçuş 6 saat 30 dəqiqə davam edəcək”, – deyə o bildirib.
Martın 4-dən 15-dək ABŞ-ın İndian-Uells şəhərində “Masters” seriyalı turnir keçiriləcək. Medvedev, Rublyov və Xaçanov yarışa ikinci mərhələdən qoşulmalıdırlar.
Fevralın 28-də İsrail Müdafiə Nazirliyi İrana qarşı “preventiv zərbə” endirildiyini açıqlayıb. Ölkədə fövqəladə vəziyyət elan olunub. Daha sonra Reuters agentliyinin məlumatına görə, ABŞ da hücumlara qoşularaq dəniz və hava vasitəsilə hədəflərə zərbələr endirib.
Həmin gün Medvedev ATP Tour çərçivəsində Dubayda keçirilən ATP-500 turnirinin finalında oynamalı idi. Lakin onun rəqibi — Niderland təmsilçisi Tallon Griekspoor zədə səbəbindən matça çıxmaqdan imtina edib. Niderlandlı tennisçi yarımfinalda Rublyova qarşı arxa bud nahiyəsindən zədə ilə mübarizə aparmışdı. Nəticədə Medvedev final görüşünü keçirmədən çempion olub.
