ABŞ və İsrailin İrana qarşı birgə hərbi əməliyyata başlaması futbol dünyasına da təsir edib. İran Futbol Federasiyasının prezidenti Mehdi Taci hücumlar səbəbindən 2026-cı il Dünya Kubokunda iştirakın "çətin" olduğunu açıqlayıb. FİFA böhran komitəsi yaratsa da, İranın yerinə İraqın turnirə dəvət edilməsi gündəmdədir.
Hafta.az yazır ki, İran Futbol Federasiyasının prezidenti Mehdi Taci Tehran televiziyasına verdiyi açıqlamada milli komandanın yayda ABŞ, Kanada və Meksikada keçiriləcək turnirdəki iştirakını qiymətləndirib. İspaniyanın "Marca" idman qəzetinin məlumatına görə, Taci bildirib: "Bu gün baş verənlərdən və ABŞ-ın hücumundan sonra Dünya Kubokuna getməyi gözləmək çətindir. Lakin bu məsələ ilə bağlı son qərarı yüksək səviyyəli idman rəsmiləri verəcək". Taci həmçinin ölkənin futbol liqalarının qeyri-müəyyən müddətə dayandırıldığını təsdiqləyib.
2026-cı il Dünya Kuboku 11 iyun - 19 iyul tarixləri arasında üç ev sahibi ölkədə keçiriləcək. Püşkatmaya əsasən, İran Belçika, Yeni Zelandiya və Misirlə birlikdə G qrupuna düşüb.
İranın bütün qrup oyunları ABŞ ərazisində keçiriləcək: İran - Yeni Zelandiya (15 iyun) - Los Anceles, İran - Belçika (21 iyun) - Los Anceles, İran - Misir (26 iyun) – Sietl.
Komanda Arizonadakı Tucson Kino İdman Kompleksində düşərgə qurmağı planlaşdırırdı. İran qrupdan çıxarsa, 3 iyulda Dallasda ABŞ ilə qarşılaşma ehtimalı var idi.
Beynəlxalq Futbol Federasiyası (FIFA) hadisələrə cavab olaraq böhran rejiminə keçib. FIFA-nın baş katibi Mattias Qrafström Uelsdə keçirilən Beynəlxalq Futbol Assosiasiyaları Şurasının (IFAB) iclasında bu məsələ ilə bağlı açıqlama verib.
FİFA rəsmisi dünya miqyasında baş verən hadisələri yaxından izləyəcəklərini vurğulayıb. 2025-ci ilin iyun ayında qüvvəyə minən ABŞ prezidentinin fərmanına əsasən, İran vətəndaşları ABŞ-a giriş üçün məhdud siyahıdadır. Lakin bildirilir ki, bu qayda idmançılar, məşqçilər və texniki heyət üzvləri üçün Dünya Kuboku kimi böyük tədbirlər üçün istisnalara imkan verir.
Keçən il Vaşinqtonda püşkatmadan əvvəl bəzi İran rəsmilərinə viza verməkdən imtina problemlərə səbəb olmuşdu. Dünya Kuboku işçi qrupunun o vaxtkı rəhbəri Endryu Culiani bütün viza qərarlarının "milli təhlükəsizliklə əlaqəli" olduğunu bildirmişdi.
İran turnirdən çıxsa və ya ABŞ viza verməkdən imtina etsə, FİFA-nın boş qalan yeri eyni konfederasiyadan (Asiya) bir komandaya verməsi gözlənilir.
İraq milli komandası 31 martda Meksikanın Monterrey şəhərində keçiriləcək qitələrarası pley-off matçında Boliviya-Surinam matçının qalibi ilə qarşılaşacaq. Bu matçda qalib gəlmək İraqın Dünya Kubokuna vəsiqə qazanmasını təmin edəcək. Lakin İranın yarışdan çıxması halında İraqın birbaşa turnirə dəvət oluna və BƏƏ-nin onların yerinə pley-off matçına göndərilə biləcəyi müzakirə olunur. İraqın məşqçisi Qraham Arnold komandasının Dünya Kubokuna vəsiqə qazanmaq məqsədi ilə bağlı demişdi: "Biz qorxmadan oynayacağıq, dünyanı şoka salacağıq və bundan zövq alacağıq".
ABŞ-İsrail birgə əməliyyatı və İranın raket hücumları 48 komandanın iştirak edəcəyi nəhəng turnirin üzərinə qara buludlar salır. İsrail və Qətərdə bəzi futbol matçları təxirə salınsa da, Qətərdə yerləşən beIN Sports yayımçısı İngiltərə Premyer Liqasının şərhini Londona köçürdü.
Los-Anceles təşkilat komitəsinin rəsmiləri hadisələri yaxından izlədiklərini və bütün diqqətlərin yaxın günlərdə FIFA-nın rəsmi açıqlamasına yönəldiyini bildiriblər.
