İsveç Silahlı Qüvvələri (SFQ) Öresund yaxınlığındakı ərazi suları üzərində şübhəli pilotsuz təyyarə uçuşu aşkar edib və İsveç sularında giriş qaydalarının mümkün pozulması ilə bağlı araşdırmaya başlayıb.
Bu barədə “Mynewsdesk” platformasında dərc olunmuş rəsmi açıqlamada bildirilir. Sveriges Television (SVT)-nin məlumatına görə, sözügedən təyyarədaşıyan gəmi strateji təlimlər üçün Malmö limanında olan Fransa Hərbi Dəniz Qüvvələrinin flaqman gəmisi olan “Şarl de Qoll”dur. Pilotsuz təyyarənin yaxınlıqdakı Rusiya gəmisindən gəldiyi və təyyarədaşıyan gəmiyə yaxınlaşdığı ehtimal olunur.
Müdafiə naziri Pol Conson SVT-yə verdiyi şərhdə hadisənin Rusiya hərbi gəmisinin İsveç ərazi sularında Öresundda olarkən baş verdiyini və pilotsuz təyyarənin Rusiyaya məxsus olduğunu bildirib. O, əlavə edib ki, SFQ “dronu ələ keçirmək” üçün tez və qətiyyətli hərəkət edib. “İsveç Silahlı Qüvvələri şübhəli pilotsuz təyyarənin əməliyyatlarını dayandırmaq üçün əks tədbirlər görüb. Pilotsuz təyyarə ilə əlaqə sonradan kəsilib”, – rəsmi açıqlamada deyilir. Müdafiə nazirinin sözlərinə görə, şübhəli gəmi Baltik dənizinə doğru irəliləyib. O, həmçinin qeyd edib ki, İsveç qüvvələri hadisə ilə bağlı Danimarka ilə əlaqə saxlayıb.
“Le Monde” qəzeti Fransa Baş Qərargahının sözçüsü Qiyom Vernetdən sitat gətirib. Vernet dronun Fransanın nüvə enerjisi ilə işləyən “Şarl de Qoll” təyyarədaşıyan gəmisindən təxminən 13 kilometr aralıda aşkarlandığını təsdiqləyib. O, əlavə edib ki, İsveç sistemləri qüsursuz işləyib və gəmidə əməliyyatlara müdaxilə etməyib.
Vernet izah edib ki, gəmidaşıyan döyüş qrupu öz müdafiə sistemləri ilə təchiz olunub, lakin tərəfdaşın ərazi sularında olduqda, həmin ölkənin mühafizəsi altına düşür. O, həmçinin dronlara qarşı müxtəlif metodlardan istifadə etməklə mübarizə aparmaq mümkün olduğunu və “tıxanma”nın dronla onun pilotu və ya naviqasiya sistemi arasında rabitəni pozmaq üçün elektron vasitələrdən istifadəyə aid olduğunu aydınlaşdırıb. İsveç Silahlı Qüvvələrinin məlumatına görə, başqa heç bir dron müşahidəsi qeydə alınmayıb.
//Samir Qurbanov, Editor.az
