"Prezident İlham Əliyevin Xocalı faciəsinin ildönümündə məhz Xocalıda olması və memorial abidə kompleksinin açılışını bu tarixə təsadüf etdirməsi dərin siyasi, mənəvi və tarixi məna daşıyan çoxqatlı bir hadisədir. Bu addım təkcə anım mərasimi deyil, həm də dövlətin, xalqın və tarixin qarşısında verilən strateji və mənəvi mesajdır".
Bu fikirləri Redaktor.az-a açıqlamasında Milli Məclisin deputatı Jalə Əliyeva bildirdi.
O qeyd etdi ki, uzun illər ərzində Xocalı faciəsinin ildönümləri xalqımız tərəfindən böyük ağrı ilə, lakin işğal faktı ilə müşayiət olunan bir reallıq fonunda qeyd olunurdu:
"Xocalı işğal altında olduğu üçün xalqın yaddaşında bu tarix həm faciə, həm də nisgil günü idi. Bu gün isə vəziyyət tamamilə fərqlidir. Prezidentin məhz Xocalıda, azad olunmuş torpaqda bu faciənin ildönümünü qeyd etməsi tarixi ədalətin bərpa olunduğunu, Xocalının artıq sahibinə qayıtdığını bütün dünyaya nümayiş etdirir. Bu, həm də siyasi iradənin və qətiyyətin nəticəsinin canlı təcəssümüdür. Dövlət başçısının həmin məkanda olması, vaxtilə soyqırımının törədildiyi torpaqda Azərbaycan dövlətinin suverenliyinin bərqərar olduğunu simvolizə edir".
Millət vəkilinin sözlərinə görə, Xocalı Soyqırımı Memorialının məhz faciənin ildönümündə açılması xüsusi seçilmiş simvolik qərardır:
"Bu, bir tərəfdən Xocalı qurbanlarının xatirəsinin dövlət səviyyəsində əbədiləşdirilməsidir, digər tərəfdən isə çox mühüm siyasi və ideoloji mesajdır: Azərbaycan xalqı öz tarixini unutmur, şəhidlərinin xatirəsini daim uca tutur və bu yaddaşı gələcək nəsillərə ötürür. Bu memorial kompleks eyni zamanda beynəlxalq ictimaiyyət üçün də bir çağırışdır. Bu, Xocalı həqiqətlərinin artıq yalnız sözlə deyil, konkret tarixi məkanda, azad edilmiş ərazidə, dövlət tərəfindən yaradılmış monumental yaddaş abidəsi ilə təsdiq olunması deməkdir. Prezidentin bu gün Xocalıda olması həm də mənəvi qələbənin təntənəsidir. Bu, təkcə torpaqların azad olunması deyil, həm də xalqın ləyaqətinin bərpasıdır. Xocalı qurbanlarının ruhuna ən böyük ehtiram onların torpağında Azərbaycan bayrağının dalğalanması və həmin torpaqda memorial kompleksin ucaldılmasıdır".
Müsahibimiz əlavə etdi ki, bu addım həm də bir mesajdır:
"Azərbaycan dövləti öz vətəndaşlarının faciəsini unutmur və onların xatirəsini ən yüksək səviyyədə əbədiləşdirir. Bu hadisə Prezident İlham Əliyevin yürütdüyü siyasətin məntiqi davamıdır. İşğal dövründə də Xocalı həqiqətlərinin dünyaya çatdırılması istiqamətində sistemli fəaliyyət aparılırdı. Bu gün isə artıq həmin siyasət yeni mərhələyə keçib – azad edilmiş Xocalıda yaddaş məkanlarının yaradılması mərhələsinə. Bu, həm də post-münaqişə dövründə Azərbaycanın tarixi yaddaşını bərpa etməsi, işğalın izlərini silməsi və milli kimliyini möhkəmləndirməsi prosesinin mühüm tərkib hissəsidir".
Jalə Əliyeva qeyd etdi ki, İlham Əliyevin Xocalı faciəsinin ildönümündə məhz Xocalıda olması bir neçə mühüm məqamı özündə birləşdirir:
"Tarixi ədalətin bərpasının təsdiqi, Xocalı qurbanlarının xatirəsinə ən yüksək səviyyədə ehtiramı, Azərbaycanın suverenliyinin və qələbəsinin nümayişini, milli yaddaşın əbədiləşdirilməsini. Bu hadisə göstərir ki, Xocalı artıq yalnız faciə simvolu deyil. Xocalı həm də qələbənin, ədalətin və milli dirçəlişin simvoluna çevrilib. Prezidentin bu gün məhz həmin torpaqda olması isə tarix qarşısında verilmiş və yerinə yetirilmiş bir vədin təntənəsi kimi qiymətləndirilməlidir".
Xədicə BAXIŞLI
